نۇرسۇلتان نازاربايەۆ پرەزيدەنت بولىپ ەل باسقارعان 30 جىلداعى ءوزىنىڭ تابىسى تۋرالى ايتتى.

"ازات ەلىمىزدىڭ جاستارى تاۋەلسىزدىككە بارار جولدىڭ قانداي ازاپتى بولعانىن، قانداي قۇرباندىقتار مەن سىناقتار – 1916 جىلعى ۇلت-ازاتتىق كوتەرىلىس، ازامات سوعىسى، اشارشىلىقتىڭ الاپات ەكى تولقىنى، قۋعىن-سۇرگىن مەن رەپرەسسيالار، ۇلى وتان سوعىسى، تىڭ يگەرۋ جىلدارىنداعى جاپپاي قونىس اۋدارۋدىڭ زاردابى ارقىلى جەتكەنىمىزدى ءبىلۋى كەرەك. مۇنىڭ ءوزى وتكەن تاريحتى قاستەرلەپ، ودان ساباق الۋ ءۇشىن قاجەت. مەنىڭ "تاۋەلسىزدىك – بابالار قانىمەن كەلگەن كيەلى قۇندىلىق" دەيتىنىم وسىدان.

مەن وتىز جىل بويى حالقىمدى قاناتتىعا قاقتىرماي، تۇمسىقتىعا شوقىتتىرماي، قايراڭعا قالدىرماي، الەمدىك وركەنيەتتىڭ الدىڭعى شەبىنە، دۇنيەدەگى ەڭ دامىعان 40 ەلدىڭ قاتارىنا قوستىم. وسى جىلدار ىشىندە الەمدىك عىلىم مەن مادەنيەتتىڭ ەڭ ۇزدىك جەتىستىكتەرىن مەڭگەرگەن جاڭا ۇرپاق قالىپتاستى. جاڭا ەلوردامىز سالىندى. ەڭ ۇلكەن تابىسىم دا، ەڭ ۇلكەن باقىتىم دا وسى دەپ سانايمىن.

ءبىز، اباي اتامىز ايتقانداي، "اقىرىن ءجۇرىپ، انىق باستىق". سونىڭ ارقاسىندا كوپ سالالار مەن باعىتتار بويىنشا وزگەلەردەن وزىپ كەتتىك" – دەدى ول "تاۋەلسىزدىك تاعىلىمى" اتتى ماقالاسىندا.