پرەزيدەنت قاسىم-جومارت توقايەۆ Twitter-دەگى پاراقشاسىندا جاڭاوزەندەگى جاعدايعا قاتىستى ەكى جازبا جاريالادى.

"ۇكىمەتكە جاڭاوزەندەگى جاعدايدى ەكونوميكالىق تۇرعىدان ەسكەرىپ، قۇقىقتىق جاعىنان تەز ارادا قاراستىرۋدى تاپسىردىم. شەرۋگە شىققاندار قوعامدىق ءتارتىپتى بۇزباۋى ءتيىس"، "ازاماتتاردىڭ جەرگىلىكتى جانە ورتالىق بيلىك ورگاندارىنا تالابىن اشىق ايتۋعا قۇقىعى بار، ءبىراق، بۇل زاڭعا، ناقتىراق ايتقاندا، بەيبىت شەرۋلەر تۋرالى زاڭعا سايكەس جۇزەگە اسىرىلۋى كەرەك" دەلىنگەن حابارلامادا.

ايتا كەتەيىك، جاڭاوزەن قالاسىنىڭ حالقى گاز باعاسىنىڭ كوتەرىلۋىنە وراي نارازىلىق بىلدىرۋدە.

ەنەرگەتيكا مينيسترلىگى وكىلدەرى گاز باعاسى نارىقتا قالىپتاسقان جاعدايعا جانە سۇرانىستىڭ كوبەيۋىنە بايلانىستى قىمباتتاعىنىن، باعا ەندى بۇرىنعى دەڭگەيگە قايتا كەلمەيتىنىن ايتادى.

قالادا ۇيالى بايلانىس پەن ينتەرنەت ۇستامايدى. جەرگىلىكتى بيلىك وكىلدەرى مەن پروكۋراتۋرا ازاماتتاردى  تاراۋعا شاقىرىپ جاتىر. نارازى ادامدار تالابى ورىندالمايىنشا الاڭنان كەتپەيتىنىن جەتكىزۋدە.

الاڭعا ىستىق تاماق، ءشاي اكەلىپ جاتقانى حابارلاندى.

تاڭەرتەڭ نارازىلىققا شىققان ادامدارمەن سويلەسۋ ءۇشىن استانادان بيلىك وكىلدەرى كەلەدى دەگەن اقپارات بار.

وقي وتىرىڭىز:

♦ اقتاۋ، اقتوبەدە ادامدار الاڭعا شىقتى. مۇنايشىلار جۇمىسىن توقتاتتى