كازتاگ اقپارات اگەنتتىگى رەداكسياسىنا "ماڭعىستاۋ وبلىسىنا ۇلتىق گۆارديانىڭ ەكى اۋەبورتى اتتانعانى" تۋرالى حابار كەلىپ تۇسكەن.
اقپاراتقا بايلانىستى ىشكى ىستەر مينيسترلىگى مەن ماڭعىستاۋ وبلىسى پوليسيا دەپارتامەنتى پىكىر بىلدىرمەگەن. تەك وبلىس اكىمىنىڭ باسپا ءسوز حاتشىسى سەرىكجان ەرمەنتايەۆ وزىندە مۇنداي اقپارات جوق ەكەنىن ايتقان.
ماڭعىستاۋ وبلىسى جاڭاوزەن قالاسى تۇرعىندارىنىڭ گاز باعاسى قىمباتتاۋىنا بايلانىستى نارازىلىق اكسيالارى جالعاسىپ جاتىر.
قالا اۋماعىندا ينتەرنەت پەن ۇيالى بايلانىس ىستەمەيدى. الەۋمەتتىك جەلى ارقىلى ءتۇرلى اقپارات جەتىپ جاتىر.
سوڭعى اقپاراتتاردا قالا ىشىندە قارۋلى كۇزەت كۇشەيگەنى، نارازى ازاماتتاردى وبلىستىڭ وزگە دە اۋداندارى قولداپ كوشەگە، الاڭعا شىعىپ جاتقانى ايتىلادى.
جۋرناليست وڭعار قابدەن Facebook پاراقشاسىندا "بۇكىل ماڭعىستاۋ وبلىسى ميتينگكە شىققانى" تۋرالى مالىمدەدى.
سونداي-اق جاڭاوزەنگە باراتىن بارلىق جولدار جابىلعانى حابارلاندى.
جەلىدە بەلسەندىلەر جاڭاوزەن تۇرعىندارىن قولداۋ ماقساتىندا قاراعاندى، الماتى قالالارىندا ميتينگكە شىعۋعا شاقىرىپ جاتىر.
بەلگىلى زاڭگەر ابزال قۇسپان الەۋمەتتىك جەلىدە جاڭاوزەنگە قولداۋ بىلدىرگەندەردىڭ ءبىرازى جەكەسىنە شىعىپ جاتقانىن جەتكىزدى.
ايتۋىنشا، ميتينگكە شىققانداردىڭ ارەكەتىنە ارانداتۋشىلىق دەپ قۇقىقتىق باعا بەرىلۋدە.
– ءيا، قىلمىستىق كودەكسىندە ارانداتۋشىلىق ارەكەتتەر ءۇشىن – قىلمىستىق جاۋاپكەرشىلىك قاراستىرىلعان. كودەكستىڭ 28 بابى، 4 بولىگىندە سوزبە-سوز بىلاي جازىلعان: “باسقا ادامدى ازعىرۋ، پاراعا ساتىپ الۋ، قورقىتۋ جولىمەن نەمەسە باسقا دا تاسىلمەن قىلمىستىق قۇقىق بۇزۋشىلىق جاساۋعا كوندiرگەن ادام ايداپ سالۋشى دەپ تانىلادى”.
ياعني، ەگەر ءسىز وسى جاعدايدى پايدالانىپ، جاڭاوزەندىك اعايىنداردى قانداي دا ءبىر قىلمىستىق ىس-ارەكەت جاساۋعا يتەرمەلەسەڭىز، تۋرا ماعىناسىندا كوندىرسەڭىز (!)، وندا ءسىزدىڭ ارەكەتىڭىز ارانداتۋشىلىق دەپ تانىلۋى بەك مۇمكىن!
الايدا، جاڭاوزەندىكتەرگە، وسىنداي قيىن جاعدايدا قولداۋ ءبىلدىرۋ، ول ەشقانداي دا ارانداتۋشىلىققا جاتپايدى! جاڭاوزەندىكتەردى قولداۋ، ەلدىڭ قوس وكپەسىنەن قىسىپ بارا جاتىرعان قىمباتشىلىققا، ونى اۋىزدىقتاۋعا شاراسىزدىق تانىتىپ وتىرعان ۇكىمەتكە، بيلىككە نارازىلىق ءبىلدىرۋ! ال ول – ءسىزدىڭ كونستيتۋسيالىق قۇقىعىڭىز، – دەدى زاڭگەر ابزال قۇسپان.
ايتا كەتەيىك، 2022 جىلعى 1 قاڭتادان باستاپ جاڭاوزەندە "كوگىلدىر" وتىن باعاسى كەنەتتەن 120 تەڭگەگە دەيىن وسكەن. تۇرعىندار كەشەلى بەرى گاز باعاسىن 60 تەڭگەگە دەيىن ءتۇسىرۋدى بەيبىت تۇردە تالاپ ەتۋدە.
پىكىر قالدىرۋ