9 قاڭتاردا "قازاقستان" جانە "حابار 24" ارنالارى "قازاقستانداعى ميتينگىگە قاتىسقانى ءۇشىن اقشا الدى" دەپ قىرعىزستان ازاماتى دەلىنگەن ادامدى كورسەتكەن ەدى. ارتىنشا وقيعا بارىسى مۇلدە باسقا ارناعا اۋدى.

ۆيكرام رۋزاحۋنوۆ ەسىمدى قىرعىزستان ازاماتى رەسمي تەلەارنالاردان كورسەتىلگەن ۆيدەودا 1 قاڭتاردا بەيتانىس ادامدار تەلەفون ارقىلى حابارلاسىپ، ميتينگىگە قاتىسۋ ءۇشىن 90 مىڭ تەڭگە ۇسىنعانىن، بيلەت اپەرگەنىن، پاتەرگە ورنالاستىرعانىن ايتادى.

كوپ ۇزاماي قىرعىزستاندىق باسىلىمدار ۆيكرام رۋزاحۋنوۆ قىرعىزستانعا بەلگىلى دجاز مۋزىكانتى ەكەنىن، قازاقستانعا كونسەرتكە كەلگەنىن جارىسا جازدى. 

مۋزىكانتتىڭ تۋىستارى ونىمەن بايلانىسا الماعاندىقتان، قىرعىزستاننىڭ قۇزىرەتتى ورگاندارىنا جۇگىنگەن. ال قىرعىزستاننىڭ سىرتقى ىستەر مينيسترلىگى وقيعاعا بايلانىستى تەكسەرىس جۇرگىزىپ، رۋزاحۋنوۆقا پوليسيا ءزابىر كورسەتكەنىن مالىمدەپ، قازاقستانعا قارسىلىق نوتاسىن جاريالادى.

قىرعىزستان سىرتقى ىستەر ءمينيسترىنىڭ ورىنباسارى نۇران نيازالييەۆ رۋزاحۋنوۆتى مۇمكىندىگىنشە تەزىرەك بوساتۋدى تالاپ ەتىپ، قازاقستاندى شەتەلدىكتەردىڭ وقيعالارعا قاتىسى تۋرالى سەنىمدى اقپارات جاريالاۋعا شاقىردى.

بۇعان دەيىن قىرعىزستاننىڭ ۇلتتىق قاۋىپسىزدىك كوميتەتىنىڭ ءتوراعاسى كامچيبەك تاحييەۆ مۇددەلى تاراپتار قىرعىز ازاماتتارى تۋرالى تەرىس اقپاراتپەن قىرعىزدار مەن قازاقتار اراسىنداعى قارىم-قاتىناستى شيەلەنىستىرۋگە تىرىسىپ جاتقانىن، جاقسى دايىندالعان اقپاراتتىق شابۋىل ەكەنىن مالىمدەگەن.

10 اقپان كۇنى «ۆەچەرنيي بيشكەك» اقپاراتتىق سايتىنىڭ مالىمەتىنشە، الماتىداعى تارتىپسىزدىككە قاتىستى دەپ ۇستالعان قىرعىزستان ازاماتى ۆيكرام رۋزاحۋنوۆتى قارۋلى كۇشتەر بوساتقان. قىرعىزستاندىق جۋرناليست كاميللا ۆالييەۆا قامشى اقپاراتتىق سايتىنا رۋزاحۋنوۆ بوساتىلعاننان كەيىن بىشكەككە جولعا شىعىپ، ەلىنە امان-ەسەن بارعانى تۋرالى حابارلادى.

قازاقستاندا بيلىككە قارسى جاپپاي نارازىلىق سوڭى تارتىپسىزدىككە ۇلاسقان سوڭ بيلىك ەلدەگى جاعدايعا "شەتەلدە دايىندالعان تەرروريستەردى" ايىپتاي باستاعان. ءبىراق بيلىك "تەرروريستەردىڭ" كىم ەكەنىن ناقتى ايتپاي وتىر.