ەلدىڭ بىرنەشە وڭىرىندە قاڭتار ايىنىڭ باسىندا بولعان جاپپاي تارتىپسىزدىكتەردەن زارداپ شەككەندەردىڭ سانى بەلگىلى بولدى. بۇل تۋرالى باس پروكۋراتۋرا قىلمىستىق قۋدالاۋ قىزمەتىنىڭ باستىعى سەرىك شالابايەۆ مالىمدەدى.
باس پروكۋراتۋرانىڭ حابارلاۋىنشا، قايتىس بولعان 225 ادامنىڭ 175ء-ى مەديسينالىق ۇيىمداردا كوز جۇمعان.
ۆەدومستۆو وكىلدەرى بۇل الدىن الا دەرەكتەر ەكەنىن اتاپ ءوتتى. ولار ءالى دە ناقتىلانادى جانە وزگەرۋى مۇمكىن ەكەنىن ەسكەرتتى.
دسم قوعاممەن بايلانىس دەپارتامەنتىنىڭ ديرەكتورى اسەل ارتاكشينوۆا تج ەنگىزىلگەن ساتتەن باستاپ 2678 زارداپ شەگۋشى مەديسينالىق كومەككە، ونىڭ ىشىندە 1815ء-ى امبۋلاتوريالىق كومەككە جۇگىنگەنىن حابارلادى.
ەسكە سالا كەتەيىك، 2 قاڭتاردا ماڭعىستاۋ وبلىسىنىڭ تۇرعىندارى سۇيىتىلعان گازدىڭ قىمباتتاۋىنا بايلانىستى ميتينگكە شىعىپ، ۇزاماي ەلدىڭ وزگە وڭىرلەرىندە دە حالىق نارازىلىعى وتكەن. بەيبىت ميتينگ تۇرىندە باستالعان نارازىلىق شارالارىنىڭ سوڭى جاپپاي تارتىپسىزدىككە ۇلاسقان. سونىڭ سالدارىنان الماتى، تالدىقورعان قالالارى قاتتى زارداپ شەكتى. تارتىپسىزدىكتەر كەزىندە اكىمدىك عيماراتى ورتەندى، پرەزيدەنت رەزيدەنسياسى باسىپ الىندى. دۇكەندەر، ساۋدا ورتالىقتارى، بانك كەڭسەلەرى مەن بانكوماتتار تونالدى.
پىكىر قالدىرۋ