قازاقستاندىق Forbes جاساعان ەلدەگى ەڭ باي ادامدار تىزىمىندە ەكىنشى ورىندا تۇرعان ميللياردەر ۆياچەسلاۆ كيم "سامۇرىق-قازىنا" ۇلتتىق ءال-اۋقات قورى ديرەكتورلار كەڭەسىنىڭ قۇرامىنان شىقتى. بۇل تۋرالى Forbes.kz باسىلىمى حابارلادى.

باسىلىم ۆياچەسلاۆ كيم كەڭەستەن ءوز ەركىمەن كەتكەنىن جازادى.

كيم كەتكەننەن كەيىن ديرەكتورلار كەڭەسى قۇرامىنىڭ ساپىندا دجون دۋداس، ونگ بۋن حۆي، لۋكا سۋتەرا، الماسادام ساتقالييەۆ، دانيار اقىشيەۆ، الىبەك قۋانتىروۆ قالدى.

ۆياچەسلاۆ كيم – Kaspi.kz ديرەكتورلار كەڭەسىنىڭ ءتوراعاسى جانە اكسيونەرى. وعان كومپانيانىڭ 24،13 پايىز اكسياسى تيەسىلى. 2021 جىلى Forbes ميللياردەرلەرىنىڭ جاھاندىق تىزىمىنە ەنگەن. ول 4 ميلليارد 200 ميلليون دوللار بايلىقپەن تىزىمدە 925 بولىپ ورنالاسقان.

بيزنەسمەنگە سونداي-اق "السەكو" اق-نىڭ 90 پايىزى تيەسىلى. ول جەردە باقىلاۋشى كەڭەس مۇشەسى.

بۇدان بولەك ول كوپتەگەن قورلارعا، مەكتەپتەرگە يەلىك ەتەدى.

ۆياچەسلاۆ كيمنىڭ ەكس-پرەزيدەنت نۇرسۇلتان نازاربايەۆپەن، ونىڭ اۋلەتى مۇشەلەرىمەن بايلانىسى تۋرالى، ولاردىڭ جاقىن ادامى ەكەنى جايلى ب ا ق بەتتەرىندە كوپتەگەن اقپارات شىققان.

كەزىندە ەكس-پرەزيدەنتتىڭ تۋىسى قايرات ساتىبالدى كيمنىڭ Kaspi بانكتەگى بيزنەس سەرىكتەسى ءارى اكسيونەرلەردىڭ ءبىرى بولعان. رەسمي دەرەكتەردە قايرات ساتىبالدى ۇلەسىن 2018 جىلى ساتىپ جىبەرگەنى ايتىلادى.