"رەسەي ۋكرايناعا ەسكەرتۋسىز شابۋىل جاساي الادى" دەپ مالىمدەدى ۇلىبريتانيا بيلىگى. ۇلىبريتانيا قارۋلى كۇشتەر ءمينيسترى دجەيمس حيپپي بريتان ازاماتتارىنا شىعىس ەۋروپا ەلىنەن "دەرەۋ كەتۋ كەرەكتىگىن" ەسكەرتتى.
حيپپي "رەسەي پرەزيدەنتى ۆلاديمير پۋتين شابۋىل تۋرالى بۇيرىق بەرگەننەن كەيىن بىرنەشە مينۋت ىشىندە ۋكراينانىڭ قالالارىنا بومبا ءتۇسۋى مۇمكىن" دەدى.
ول ۋكراينادان قانشا بريتان ازاماتى كەتكەنىن ءبىلۋ مۇمكىن ەمەس ەكەنىن ايتىپ، وندا قالعانداردىڭ بارلىعىن "دەرەۋ كەتۋگە" شاقىردى.
– بۇل – ءۇش ايدان كەيىن بولۋى مۇمكىن نارسە تۋرالى ەسكەرتۋ ەمەس، بۇل – كەلەسى ەسكەرتۋلەرگە جالعاساتىن ەسكەرتۋ ەمەس. پۋتين بۇيرىق بەرگەننەن كەيىن بىرنەشە مينۋتتان كەيىن ۋكراينا قالالارىنا زىمىراندار مەن بومبالار ءتۇسۋى مۇمكىن، بۇل – بريتان ازاماتتارىىڭ مۇمكىندىگى بار كەزدە، ءدال ءقازىر كەتۋى كەرەك ەكەنىن جەتكىزەتىن ەسكەرتۋ، – دەدى حيپپي.
ۇلىبريتانيا پرەمەر-مينيسترى بوريس دجونسون داعدارىس "سىني كەزەڭگە" وتكەنىن، رەسەيمەن كەلىسىمگە سوڭعى ديپلوماتيالىق كۇش-جىگەر قاراستىرىلىپ جاتقانىن مالىمدەدى.
لوندون ماسكەۋ "كەز كەلگەن ساتتە" ۋكرايناعا باسىپ كىرۋدى جوسپارلاپ وتىرعانىن ەسكەرتتى، ءبىراق ۇلىبريتانيا پرەمەر-مينيسترى شيەلەنىستى ازايتۋ ءۇشىن "مۇمكىندىكتەر" قاراستىراتىنىن جانە ەۋروپاعا ساپارى الدىندا الەم كوشباسشىلارىمەن كەلىسسوزدەر جۇرگىزەتىنىن جاريالادى.
پىكىر قالدىرۋ