قاڭتار وقيعاسى قۇرباندارىن ەسكە الۋ ميتينگىنە قاتىسقانى ءۇشىن بەيبىت جيىن وتكىزۋ ءتارتىبىن بۇزدى دەگەن ايىپپەن 15 تاۋلىككە قامالعان ساياسي بەلسەندى، دەموكراتيالىق پارتيا قۇرۋ بويىنشا ىنتالى توپ جەتەكشىسى جانبولات ماماي اكىمشىلىك جازا مەرزىمى اياقتالار شاقتا تاعى 48 ساعاتقا قاماۋعا الىندى.
بەلسەندىنىڭ ايەلى جۋرناليست ينگا يمانبايدىڭ ايتۋىنشا، دۇيسەنبى، 14 ناۋرىز كۇنى جانبولات مامايدى 2 ايعا قاماۋعا الۋ بويىنشا سانكسيالىق سوت بولادى. جانبولات ماماي ۇستىنەن "پوليسيانى قورلادى، جالعان مالىمەت تاراتتى" دەگەن ايىپتار بويىنشا قىلمىستىق ءىس قوزعالعانىن ءمالىم ەتكەن. بۇل تۋرالى ول اباقتىدان ادۆوكاتى ارقىلى جولداعان حاتتا جەتكىزگەن.
"ءقادىرلى اعايىن! مەنى ساياسي سەبەپتەرمەن، ساياسي قۋدالاۋدىڭ ناتيجەسىندە قاماۋعا الدى. پوليسيانى قورلادى، جالعان مالىمەت تاراتتى دەپ. ەشقانداي قىلمىس جاساعان جوقپىن. ءوز كىنامدى مويىندامايمىن. ءبىزدىڭ جولىمىز اق، ادال. قولداۋ كورسەتكەن بارشا اعايىنعا العىس ايتامىن. حالىقارالىق ۇيىمدار قولداۋ كورسەتۋى كەرەك دەپ سانايمىن. بىرگە جەڭەمىز!" دەيدى ساياسي بەلسەندى 12 ناۋرىز كۇنگى حاتىندا.
وپپوزيسيالىق جۋرناليست ەرمۇرات باپي جانبولات مامايدىڭ ۇستىنەن قىلمىستىق ءىس قوزعالۋىنىڭ ساياسي استارى بار دەپ سانايدى. سوزىنشە، مۇنىڭ ارتىندا دەموكراتيالىق پارتيا دەگەن اتاۋمەن ساياسي پارتيا قۇرعىسى كەلىپ جۇرگەن بەلسەندىنىڭ ارەكەتىن توقتاتۋ ويى تۇر.
"جانبولاتقا قاتىستى اكىمشىلىك جازانىڭ سوڭىن قىلمىستىق ىسكە الماستىرۋدىڭ امالىنان ەكى بولجام جاساۋعا بولادى:
بىرىنشىدەن، بيىلعى جاز-كۇز ماۋسىمىندا مەرزىمىنەن بۇرىن پارلامەنتتىك سايلاۋ ءوتۋى مۇمكىن؛
قىلمىستىق جاۋاپكەرشىلىككە تارتىلعان (ەكى ايلىق تەرگەۋدەن كەيىن، سوت مامايعا ارى كەتكەندە بوستاندىعىن شەكتەۋ نەمەسە شارتتى جازا بەرەدى) ازامات رەتىندە جانبولات سايلاۋدان شەتتەتىلەدى (قازىرگى قولدانىستاعى سايلاۋعا قاتىستى زاڭدىلىقتارىنىڭ تالابى بويىنشا)؛
ەكىنشىدەن، پرەزيدەنت توقايەۆتىڭ ناۋرىز جولداۋىنان كەيىن، سايلاۋ جانە ساياسي پارتيالار تۋرالى زاڭدارعا ازداعان وزگەرىستەر ەنگىزىلەتىن بولسا، بيلىكپەن مامىلەلەسۋگە كونبەيتىن وپپوزيسيالىق ساياساتكەر جانبولاتتىڭ دەمپارتياسىن سايلاۋعا دەيىن "قاعىپ تاستاپ"، تىركەۋدەن وتكىزبەۋدىڭ ارەكەتى جاسالۋدا" دەيدى جۋرناليست.
جانبولات مامايدىڭ جاقتاستارى 14 ناۋرىز كۇنى الماتى قالاسى پوليسيا دەپارتامەنتى عيماراتىندا جينالىپ، بەلسەندىنىڭ بوستاندىعىن تالاپ ەتپەك.
پىكىر قالدىرۋ