قايرات ساتىبالدى ۇلى ۇستالىپ، ۋاقىتشا ۇستاۋ يزولياتورىنا قامالدى. بۇل تۋرالى "Qazaqstan" ۇلتتىق ارناسى ءمالىم ەتتى.
"سىبايلاس جەمقورلىققا قارسى قىزمەت لاۋازىمدىق وكىلەتتىكتەرىن اسىرا پايدالانۋ جانە "قازاقتەلەكوم" اق-نىڭ قاراجاتىن اسا ءىرى كولەمدە ۇرلاۋ فاكتىلەرى بويىنشا قىلمىستىق ءىستى تەرگەۋدە.
اتالعان قىلمىستاردى جاسادى دەگەن كۇدىكپەن قايرات ساتىبالدى ۇلى ۇستالىپ، ۋاقىتشا ۇستاۋ يزولياتورىنا قامالدى.
ق. ساتىبالدى ۇلىنىڭ مەملەكەت قاۋىپسىزدىگىنە نۇقسان كەلتىرەتىن باسقا دا قىلمىستارعا قاتىستىلىعى تەكسەرىلۋدە" دەلىنگەن حابارلامادا.
كەي دەرەككوزدەر قايرات ساتىبالدى تۇركياعا كەتكەلى جاتقانىندا ۇستالعانىن جازدى.
قايرات ساتىبالدى ەكس-پرەزيدەنت نۇرسۇلتان نازاربايەۆتىڭ مارقۇم ءىنىسى ساتىبالدىنىڭ ۇلى. ەلدەگى باي ادامداردىڭ ءبىرى. كەزىندە ۇلتتىق قاۋىپسىزدىك كوميتەتىندە، "Kazakh Oil"، "قازاقستان تەمىر جولى" ۇلتتىق كومپانيالارىندا ىستەگەن. "Kaspi.kz" اكسيونەرلىك قوعامىنىڭ نەگىزگى اكسيونەرى بولعان. ءدىني ورتالاردا ىقپالدى ادام سانالادى. ول يسلام ءدىنىنىڭ ءسالافيزم اعىمىنىڭ بەلدى وكىلى دەگەن بەيرەسمي اقپارات بار.
