"China Eastern Airlines" اۋە كومپانياسىنا تيەسىلى بورتىندا 132 ادام بار قىتايلىق "Boeing 737" ۇشاعى كۋنمين قالاسىنان گۋانچجوۋعا ۇشىپ بارا جاتىپ، گۋانسي پروۆينسياسىندا قۇلاپ، ورتەنىپ كەتتى.

اپات سالدارىنان ءتىرى قالعاندار جوق دەپ بولجانىپ وتىرعانىمەن، زارداپ شەككەندەر سانى مەن اپاتتىڭ سەبەبى ازىرگە بەلگىسىز.

قىتايلىق اۋە كومپانيالارىنىڭ جالپى قاۋىپسىزدىك كورسەتكىشتەرى جاقسى: سوڭعى ءىرى اپات 12 جىل بۇرىن بولعان.

اپات ورنىنا 600-دەن استام توتەنشە جاعداي قىزمەتكەرى جەتتى، دەپ حابارلادى مەملەكەتتىك ب ا ق.

وقيعا ورنىنا ءبىرىنشى جەتكەن ءورت سوندىرۋشىلەر ۇشاق اپاتىنان تۋىنداعان ءورتتى ءسوندىرىپ ۇلگەردى، دەپ حابارلادى CCTV.

قىتايدىڭ الەۋمەتتىك جەلىلەرىندە جەرگىلىكتى اۋىل تۇرعىندارى تۇسىرگەن اپاتتان شىققان ءورت پەن ءتۇتىن، جەردەگى ۇشاق قالدىقتارى بەينەلەنگەن كادرلار تاراپ كەتتى.