قۇقىققورعاۋ ورگانى قىزمەتكەرىن قورلادى، "جالعان اقپارات" تاراتتى دەگەن ايىپتارمەن ۇستىنەن ەكى قىلمىستىق ءىس قوزعالىپ، اباقتىعا قامالعان ساياسي بەلسەندى، تىركەلمەگەن "دەموكراتيالىق پارتيانىڭ" جەتەكشىسى جانبولات ماماي امنيستيامەن بوستاندىققا شىعارىلمادى. بۇل تۋرالى ونىڭ جاقتاستارى ءمالىم ەتتى.
"جانبولات ماماي تۇرمەدە قالدى. جاقتاستارى نارازى. "كىناسىن مويىندامادى" دەگەن سىلتاۋمەن بوستاندىق بەرمەي قويدى. ول جوق كىنانى نەگە مويىنداۋى كەرەك؟ وعان قاتىستى امنيستيا قولدانباعانى زاڭسىز. ونى قاماپ، زاڭسىزدىققا بارعانىمەن قويماي، كىناسىن مويىنداتپاق بولعانى ەكى ەسە زاڭسىز. جانبولاتتىڭ مويىندايتىنداي ەش كىناسى جوق. ونىڭ بوستاندىعى ءۇشىن كۇرەسەمىز. جانبولات بوسامايىنشا توقايەۆقا تىنىم بەرمەيمىز، حالىقارالىق قاۋىمداستىق تا وعان تىنىشتىق بەرمەيدى" دەيدى بەلسەندىنىڭ ايەلى، جۋرناليست ينگا يمانباي Facebook-تەگى تىكەلەي ەفيردە.
جانبولات مامايدىڭ جاقتاستارى بەلسەندىنى بوستاندىققا شىعارماعان سوڭ الدىمەن "سي-18" دەپ اتالىپ كەتكەن لا-155/18 مەكەمەسىنىڭ الدىندا، ارتىنشا الماتى قالاسى پوليسيا دەپارتامەنتى عيماراتى الدىندا نارازىلىق وتكىزدى.
الماتى قالاسى المالى اۋدانىنىڭ پروكۋرورى باۋىرجان ەرتايەۆ جانبولات مامايدىڭ بوستاندىققا شىعارىلماۋىنا جوعارعى سوتتىڭ سوت ۇكىمى تۋرالى 4-نورماتيۆتىك قاۋلىسىنىڭ 9-تارماعى نەگىز بولعانىن ءمالىم ەتتى. ول بويىنشا راقىمشىلىق قولداناتىن كەزدە امنيستيانى قولدانۋ تۋرالى كەلىسىم بەرىلگەن جاعدايدا، ايىپتالۋشى كىناسىن مويىنداۋى كەرەك. ال جانبولات ماماي مويىندايتىنداي كىناسى جوقتىعىن، تاعىلعان ايىپ نەگىزسىز ەكەنىن مالىمدەپ، تاعىلعان ايىپتى مويىنداۋدان باس تارتقان.
جانبولات مامايدىڭ جاقتاستارى مەن ادام قۇقىعى سالاسىنداعى بەدەلدى حالىقارالىق Human Rights Watch جانە Amnesty International ۇيىمدارى بەلسەندىنى قۋدالاۋدىڭ ساياسي استارى بار ەكەنىن ايتادى.
پىكىر قالدىرۋ