ۋكراينا پرەزيدەنتى ۆلاديمير زەلەنسكيي باسقىنشىلىق سوعىس باستالعالى رەسەي كۇشتەرى ورنى تولماس شىعىنعا ۇشىراعانىن ايتتى.
"رەسەي كييەۆتى 48 ساعاتتا باسىپ الامىز دەپ ماقتانعانى ەسىڭىزدە مە؟ 48 تاۋلىككە سوزىلعان "48 ساعاتتىڭ" ىشىندە ورىس اسكەرى كەڭەس وداعى اۋعانستانداعى ون جىل سوعىستا جوعالتقان شىعىنان دا ۇلكەن، ورنى تولماس شىعىنعا ۇشىرادى" دەدى زەلەنسكيي ۆيدەو ۇندەۋىندە.
24 اقپاندا سوعىس العاش باستالعاندا رەسەي ۋكراينا استاناسى كييەۆتى باسىپ الماق بولعان. الايدا رەسەي اسكەرى ۇلكەن شىعىنعا ۇشىراعاننان كەيىن كييەۆكە شابۋىل توقتاعان. ساراپشىلاردىڭ پىكىرىنشە، ماسكەۋ ۋكراينانىڭ قارسىلاسۋ كۇشى مەن ۋكرايندەردىڭ شاعىن قارۋلى كۇشتەرىنىڭ مۇمكىندىكتەرىن جەتە باعالاماعان.
ءتىپتى رەسەي اسكەرى ءوزى ىشىندە قاراپايىم قيىندىقتارعا تاپ بولدى. بروندى كولوننالاردا وتىن، ازىق-تۇلىك، ءوق-دارى تاۋسىلعان جاعدايلار بولدى. كولىكتەر بۇزىلىپ، قاراۋسىز قالىپ، ولاردى ۋكراين تراكتورلارى سۇيرەپ اكەتكەن وقيعالار دا كەزدەستى.
ءقازىر رەسەيلىك كۇشتەر كييەۆتىڭ توڭىرەگىنەن تولىعىمەن شىعارىلىپ، شىعىستاعى دونەسك پەن لۋگانسك ايماقتارىندا اسكەري كۇشتەرىن جاساقتاپ جاتىر.
پىكىر قالدىرۋ