"AMANAT" پارتياسىنىڭ ءتوراعاسى قاسىم-جومارت توقايەۆ وسى جىلدىڭ 26 ساۋىرىندە كەزەكتەن تىس XXIII سەزدى شاقىرۋ تۋرالى شەشىم قابىلدادى. بۇل تۋرالى پارتيانىڭ اتقارۋشى حاتشىسى اسحات ورالوۆ Facebook پاراقشاسىندا مالىمدەدى.
"وعان بارلىق وڭىرلەردەن دەلەگاتتار قاتىسادى. سەزد ونلاين فورماتتا وتەدى. ورتالىق اپپارات فيليالدارمەن بىرلەسىپ دايىندىق ءىس-شارالارىن باستادى. سەزد بارىسىندا "ADAL" ساياسي پارتياسىنىڭ "AMANAT" پارتياسىنا قوسىلۋى تۋرالى ماسەلە قارالادى دەپ جوسپارلانۋدا" دەلىنگەن اسحات ورالوۆتىڭ جازباسىندا.
بۇعان دەيىن "Adal" پارتياسىنىڭ ساياسي كەڭەسى "Amanat" پارتياسىنا قوسىلۋ تۋرالى ءبىراۋىزدان شەشىم قابىلداعان. پارتيا مالىمدەمەسىندە بۇگىنگىدەي اۋمالى-توكپەلى كەزەڭ جىلدام بەيىمدەلۋدى قاجەت ەتەتىنى ايتىلىپ، "سىرتقى ساياساتتاعى قاۋىپ-قاتەردىڭ كەزىندە، كەي ماسەلەلەرگە قاتىستى پىكىر قايشىلىعىن قويىپ، "ءبىر جاعادان باس، ءبىر جەڭنەن قول شىعارىپ"، بىرگە قادام جاسايتىن كەزەڭ تۋدى" دەلىنگەن.
"ادال" 2020 جىلعى قاراشادا اتاۋى وزگەرگەن بۇرىنعى "بىرلىك" پارتياسى. 2013 جىلى تىركەلگەن. ەلدەگى رەسمي تىركەلگەن 6 پارتيانىڭ ءبىرى. پارتيا مۇشەلەرى "رەبرەندينگ" سەبەبىن "ادىلدىكتى تالاپ ەتۋشىلەر كوبەيدى" دەپ تۇسىندىرگەن. پارتيا سوڭعى پارلامەنت سايلاۋىندا پارلامەنتكە وتۋگە مۇمكىندىك بەرەتىن تابالدىرىق – 7 پايىز داۋىستى جيناي الماعان.
پىكىر قالدىرۋ