شقو اكىمى دانيال احمەتوۆ قازاقستانداعى بالالار جىلى اياسىندا ءوڭىردىڭ دارىندى وقۋشىلارىمەن، رەسپۋبليكالىق جانە حالىقارالىق زياتكەرلىك وليمپيادالاردىڭ، سپورتتىق جارىستاردىڭ، شىعارماشىلىق كونكۋرستاردىڭ جانە WorldSkills Kazakhstan ۇلتتىق چەمپيوناتىنىڭ جەڭىمپازدارىمەن كەزدەستى.
ءىس-شارا بالالار جىلى اياسىندا وتكىزىلدى. باستى ماقسات – وقۋدا ۇزدىك، شىعارماشىلىقتا جانە سپورتتا جوعارى جەتىستىكتەر كورسەتكەن تالانتتى وقۋشىلار مەن ستۋدەنتتەرگە قۇرمەت كورسەتىپ، قولداۋ ءبىلدىرىپ، جەتىستىكتەرگە جىگەرلەندىرۋ، حالقىنا دەگەن سۇيىسپەنشىلىك سەزىمدى ۇيالاتىپ، ءوز ەلىنىڭ پاتريوتى بولۋعا تاربيەلەۋ.
شارانىڭ باسىندا ءوڭىر باسشىسى ءسوز الىپ، جينالعان وسكەلەڭ ۇرپاققا بولاشاققا باعدار بەرەتىن وي ايتتى.
«قازاقستان الەمدە قازبا بايلىقتارى مول مەملەكەتتەردىڭ ءبىرى. وسىناۋ يگىلىكتى ىسكە اسىرىپ، جاھاندا الدىڭعى قاتاردا ەل بولۋى ءۇشىن سەندەردىڭ ءبىلىمدى بولۋلارىڭ ايرىقشا قاجەت. سوندىقتان دا باسەكەگە قابىلەتتى بولىپ، ۇلگەرىمدەرىڭ جاقسى بولۋى ءتيىس. وڭىردە الاڭسىز ءبىلىم الۋعا بارلىق جاعداي جاسالعان. ەندەشە جاس دوستارىم بەرەكە-بىرلىكتىڭ ءقادىرىن ءبىلىپ، حالىقتار اراسىنداعى دوستىققا ەرەكشە ءمان بەرىپ، قاسيەتتى وتانىمىز قازاقستاننىڭ دامۋىنا ءبىپ كىسىدەي ۇلەس قوسادى دەگەن مول سەنىمدەمىن» دەدى شقو اكىمى دانيال احمەتوۆ.
2021 جىلى شىعىس قازاقستان وبلىسىنىڭ وقۋشىلارى بەدەلدى حالىقارالىق جانە رەسپۋبليكالىق وليمپيادالاردا جوعارعى كورسەتكىشتەرگە قول جەتكىزدى. وقۋشىلار 208 مەدالدى جەڭىپ الدى، ونىڭ ىشىندە 60 التىن، 66 كۇمىس جانە 82 قولا بار.
سوڭعى ءۇش جىل ىشىندە وڭىردەگى كوللەدج ستۋدەنتتەرىنىڭ كومانداسى WorldSkills Kazakhstan ۇلتتىق چەمپيوناتىنىڭ ءابسوليۋتتى جەڭىمپازدارى اتانىپ، حالىقارالىق ارەنادا ەلدىڭ اتىن شىعارىپ، ەل نامىسىن ابىرويمەن قورعاپ كەلەدى.
2021 جىلى WorldSkills Kazakhstan ۇلتتىق چەمپيوناتىندا كوللەدج ستۋدەنتتەرى 27 مەدال جەڭىپ الدى، ونىڭ ىشىندە 13 التىن، 5 كۇمىس جانە 9 قولا بار.
ايماق باسشىسىمەن كەزدەسۋگە كەلگەن بارلىق قاتىسۋشىلارعا وبلىس اكىمىنىڭ اتىنان گراموتالار مەن ديپلومدار تابىستالادى. سونىمەن قاتار WorldSkills Kazakhstan ۇلتتىق چەمپيوناتىنىڭ جەڭىمپازدارىنا نوۋتبۋكتار سىيعا تارتىلىپ، دارىندى وقۋشىلارعا 100 000 تەڭگەنىڭ سەرتيفيكاتى بەرىلدى.
پىكىر قالدىرۋ