ءماجىلىس دەپۋتاتتارىنىڭ ايماقتارعا ساپارى بۇگىن اقمولا، الماتى، ماڭعىستاۋ، جەتىسۋ وبلىستارىندا جالعاستى.

«AMANAT» پارتياسى فراكسياسىنىڭ مۇشەلەرى  – اسقاربەك ۇيسىمبايەۆ،  يۋليا كۋچينسكايا، ءمادي ەلۋبايەۆ بۋراباي اۋدانىنىڭ كىندىكقاراعاي اۋىلىنداعى ءسۇت-تاۋارلى فەرماسىنىڭ ەڭبەك ۇجىمىمەن كەزدەستى.

وندا حالىق قالاۋلىلارى سايلاۋشىلارعا رەفەرەندۋمنىڭ ءمان-ماڭىزىن ءتۇسىندىردى.

دەپۋتاتتاردىڭ ايتۋىنشا، بۇل ناۋقان «جاڭا قازاقستان» قۇرۋ جولىنداعى العاشقى ناقتى ءارى باتىل قادام. ويتكەنى، مەملەكەتتىك قۇرىلىستىڭ قۇقىقتىق نەگىزىن قۇرايتىن اتا زاڭىمىزعا ەنگىزىلەتىن وزگەرىستەر حالىق تالقىسىنا شىعارىلىپ، بارشا قازاقستاندىقتاردىڭ وي-پىكىرىن ەسكەرە وتىرىپ، قابىلدانعالى وتىر.

– بءىز بولاشاق دامۋ جولىمىزدى بۇكىل ەل بولىپ بىرلەسە شەشكەلى وتىرمىز. بۇل قادام ەل ەرتەڭى ءۇشىن ءاربىر ازاماتتىڭ وي-پىكىرىنىڭ قانشالىقتى  ماڭىزدى ەكەنىن، جاڭا مەملەكەت قۇرۋدا ءوزىنىڭ دە ۇلەس سالماعى بارىن سەزىنۋگە مۇمكىندىك بەرەدى. سوندىقتان ورتاق ۇمتىلىسىمىزدىڭ ناتيجەلى بولاتىنىنا ەش كۇمان جوق، – دەدى دەپۋتات اسقاربەك ۇيسىمبايەۆ.

دەپۋتاتتار وزگەرەتىن 33 باپتىڭ ءارقايسىسىنا توقتالىپ، اسىرەسە، پرەزيدەنت پەن پارلامەنت وكىلەتتىگىندەگى جاڭاشىلدىقتارعا ايرىقشا نازار اۋداردى.  

ءوز كەزەگىندە، كەزدەسۋگە قاتىسقان فەرما قىزمەتكەرلەرى رەفەرەندۋمدى قولدايتىندىقتارىن ايتتى.

– ءبىز پرەزيدەنتىمىزدىڭ «جاڭا قازاقستان» قۇرۋ باعىتىنداعى بارلىق باستامالارىن بىلەمىز. بۇگىن وسى تاقىرىپ توڭىرەگىندە مازمۇندى ءارى اسەرلى اڭگىمە بولدى. ءبىز شاعىن ۇجىم بولساق تا رەفەرەندۋمعا اتسالىسىپ، داۋىس بەرەمىز. پرەزيدەنتتى قولدايمىز، – دەدى مال دارىگەرى بەيسەنباي احمەتوۆ.

ال ءماجىلىس دەپۋتاتتارى – ەدىل جاڭبىرشين مەن سامات مۇسابايەۆ مۇنايلى اۋدانىنىڭ جۇرتشىلىعىمەن كەزدەستى.

جيىندا دەپۋتاتتار رەفەرەندۋمنىڭ ماڭىزدىلىعىنا توقتالا كەلە، حالىق داۋسىنىڭ شەشۋشى ءرول اتقاراتىنىن، وعان ءار ازاماتتىڭ اتسالىسۋى كەرەكتىگىن اتاپ ءوتتى.

– رەفەرەندۋمعا قاتىسىپ، كونستيتۋسيالىق رەفورمالاردى قولداۋىمىز كەرەك. ول ءبىزدىڭ جۇرەك قالاۋىمىزبەن ۇندەس. سوندىقتان تۇرعىندار ونىڭ ءمان-ماڭىزىن جەتە تۇسىنە ءبىلۋى قاجەت، – دەدى ارداگەر قالنياز وڭدابايەۆ.

الماتى وبلىسى قاراساي اۋدانىندا مءاجىلىس دەپۋتاتتارى دانيار الىمبايەۆ پەن ماقپال تاجماعانبەتوۆا دا حالىقپەن جۇزدەستى. وعان اۋدان اقساقالدارى، قوعامدىق پىكىر كوشباسشىلارى، دەنساۋلىق ساقتاۋ، ءبىلىم بەرۋ ۇيىمدارى، كاسىپوداقتار وكىلدەرى مەن جۋرناليستەر قاتىستى.

حالىق قالاۋلىلارىنىڭ پىكىرىنشە، ەل تاعدىرىن انىقتايتىن رەفورمالارعا تەك دەپۋتاتتار عانا ەمەس، بۇكىل حالىق اتسالىسۋى قاجەت.

جەتىسۋ وبلىسىندا «اق جول» دەموكراتيالىق پارتياسى فراكسياسىنىڭ جەتەكشىسى ازات پەرۋاشيەۆ ءبىرقاتار كەزدەسۋ وتكىزدى.

ساپار بارىسىندا دەپۋتات قاپال-اراسان اۋىلىنداعى بارلىبەك سىرتتان ۇلى اتىنداعى مەكتەپتە كورنەكتى ساياسي قايراتكەر، اعارتۋشى بارلىبەك سىرتتان ۇلى ءمۇسىنىءنىڭ اشىلۋىنا قاتىستى. وندا ب.سىرتتان ۇلىنىڭ ۇستانىمدارىمەن ۇندەس كەلەتىن قازىرگى پرەزيدەنت رەفورمالارىنىڭ ماڭىزدى تۇستارىن ايتىپ، جينالعان قاۋىمدى رەفەرەندۋمعا اتسالىسۋعا شاقىردى.

ودان كەيىن دەپۋتات «قاينار» ءجشس-نىڭ تالدىقورعانداعى قورعاسىن باتارەيالارى زاۋىتىندا بولدى. كاسىپورىن ەلەكتروتەحنيكا سالاسىندا دا، جەتىسۋ وڭىرىندە دە ەڭ تابىستى كاسىپورىنداردىڭ ءبىرى. دەپۋتات وندا ينجەنەرلىك-تەحنيكالىق قىزمەتكەرلەرمەن اڭگىمەلەسءىپ، كونستيتۋسيالىق رەفورما جايىن تالقىلادى.

پارلامەنت ءماجىلىسى اپپاراتىنىڭ باسپا ءسوز قىزمەتى