“قازشاح فەدەراسياسى” رەسپۋبليكالىق قوعامدىق بىرلەستىگىنىڭ العاشقى جينالىسى ءوتتى. جيىن بارىسىندا باسشىلىق قۇرىلىمنىڭ قۇرامى بەكىتىلىپ، بىرلەستىكتىڭ الداعى جۇمىسىن جۇيەلەندىرۋ جايى تالقىلاندى.

ەكونوميكا عىلىمدارىنىڭ دوكتورى، ق ر مەملەكەتتىك سىيلىعىنىڭ لاۋرەاتى، اكادەميك ورازالى سابدەن “قازشاح” فەدەراسياسىنىڭ قۇرمەتتى ءتوراعاسى بولىپ تاعايىندالسا، كاسىپكەر تالعات ابدۋللايەۆ “قازشاح” فەدەراسياسىنىڭ پرەزيدەنتى بولىپ بەكىتىلدى. فەدەراسيانىڭ I ۆيسە-پرەزيدەنتى لاۋازىمىنا جۋرناليست گۇلنۇر ءسالىمباي لايىق دەپ تانىلدى.

باسقوسۋدا فەدەراسيا مۇشەلەرى بىرلەستىك جۇمىسىن ىلگەرىلەتۋ جولدارى تۋرالى پىكىر الماستى. العاشقى ءتۋرنيردى وتكىزۋ، ەلدىڭ وزگە قالالارىنان فەدەراسيا فيليالىن اشۋ، قازاق شاحماتىن ۇلتتىق ويىندار قاتارىنى قوسۋ سەكىلدى ناقتى جۇمىس جوسپارى بەكىتىلدى.

قازاق شاحماتى كلاسسيكالىق شاحماتتان ايىرماشىلىعى ويىنعا جۇپتاسقان 4 ادام ەكى توپقا ءبولىنىپ سىنعا تۇسەدى. ويىن ناتيجەسى بويىنشا 2 ويىنشى جەڭىسكە جەتەدى. بۇل كوماندا بولىپ جۇمىس ىستەۋدى دامىتادى، ويىنشىلاردى ءبىرىن-بىرى ءۇنسىز ۇعىپ، ويمەن تۇسىنۋگە ۇندەيدى. سول ارقىلى اۋىزبىرشىلىككە شاقىرادى. قازاق شاحماتىنىڭ اۆتورلارى ونەرتاپقىش ازات بايسەركەيەۆ، ەكىنشى اۆتور ءسالىمباي گۇلنۇر.

ادىلەت مينيسترلىگىندە رەسمي تىركەۋدەن ءوتىپ، زاڭدى تۇلعا رەتىندە جۇمىسىن باستاپ كەتكەن "قازشاح” فەدەراسياسى قازاق شاحماتىن الەمگە الىپ شىعىپ، سول ارقىلى ەل مەرەيىن زياتكەرلىك سپورت باسەكەلەرىندە ۇستەم ەتۋدى كوزدەيدى.