ءماجىلىس ءتوراعاسى ەرلان قوشانوۆ تۇركىتىلدەس ەلدەر پارلامەنتتىك اسسامبلەياسى ميسسياسىنىڭ بايقاۋشىلارىمەن كەزدەستى.
باسقوسۋعا تۇركيا رەسپۋبليكاسى ۇلى ۇلتتىق جينالىسىنىڭ دەپۋتاتى رەدجەپ شەكەر، ازەربايجان رەسپۋبليكاسى ميللي مەدجيليسىنىڭ دەپۋتاتى حيكمەت مامەدوۆ، قىرعىز رەسپۋبليكاسى جوگوركۋ كەنەشىنىڭ دەپۋتاتى چولپون سۋلتانبەكوۆا جانە تۇركپا باس حاتشىسى مەحمەت سۇرەييا ەر قاتىستى.
ءماجىلىس سپيكەرى بۇل كەزدەسۋدىڭ قازاقستان ءۇشىن جاۋاپتى ءارى تاريحي كەزەڭدە ءوتىپ جاتقانىن اتاپ ءوتتى.
«ەكى كۇننەن كەيىن وتەتىن ۇلكەن ساياسي ناۋقان – رەسپۋبليكالىق رەفەرەندۋم بارىسىن بايقاۋعا ارنايى كەلگەن تۇركپا دەلەگاسياسىنا شىن جۇرەكتەن العىسىمدى بىلدىرەمىن. 5 ماۋسىمدا سىزدەردىڭ ميسسيا حالىق بەلسەندىلىگىنە كۋا بولىپ، ءادىل باعاسىن بەرەدى دەپ ويلايمىن»، – دەدى ەرلان قوشانوۆ.
ءوز كەزەگىندە، بايقاۋشىلار كونستيتۋسيالىق رەفورمالار قازاقستاننىڭ ودان ءارى دامۋىنا تىڭ سەرپىن بەرەتىنىنە سەنىم ءبىلدىردى.
«دەموكراتيا – ۇنەمى دامىپ وتىراتىن پروسەسس. وسى ورايدا ءماجىلىستىڭ ءرولى ەرەكشە. 1995 جىلدان كەيىن وتكىزىلىپ وتىرعان رەفەرەندۋمنىڭ دا ماڭىزى زور دەپ ويلايمىن. جەكسەنبى كۇنى وتەتىن ناۋقان قازاقستان حالقى جانە جالپى تۇركى جۇرتى ءۇشىن جاقسىلىقتىڭ نىشانى بولادى دەگەن سەنىمدىمىز. باۋىرلاس قازاق ەلى جارقىن بولاشاققا نىق قادام جاسايدى دەپ بىلەمىز»، – دەدى تۇركيا رەسپۋبليكاسى ۇلى ۇلتتىق جينالىسىنىڭ دەپۋتاتى رەدجەپ شەكەر.
كەزدەسۋ سوڭىندا ەرلان قوشانوۆ كوپجاقتى بايلانىستاردى نىعايتۋدا پارلامەنتارالىق ىنتىماقتاستىقتىڭ ماڭىزى زور ەكەنىن ايتتى.
