شىعىستىڭ ەسىمى ەلگە تانىمال سپورتشىلارى، مادەنيەت جانە ونەر قايراتكەرلەرى رەفەرەندۋمعا بەلسەندى قاتىسىپ، وزدەرىنىڭ ازاماتتىق ۇستانىمدارىن كورسەتىپ جاتىر.

سولاردىڭ ءبىرى، قازاقستاننىڭ ەڭبەك سىڭىرگەن سپورت شەبەرى، حالىقارالىق تۋرنيرلەردىڭ بىرنەشە دۇركىن چەمپيونى، «قازاقستان بارىسى»، «الەم بارىسى» اتاقتارىنىڭ يەگەرى ايبەك نۇعىماروۆ سەمەيدەگى №178 ۋچاسكەدە داۋىس بەردى.

– وسى رەفەرەندۋمنان كەيىن ءبىزدىڭ ەلىمىزدى ۇلكەن وزگەرىستەر كۇتىپ تۇر. مەن بۇگىن ءوز تاڭداۋىمدى جاسادىم. ادامداردىڭ ۋچاسكەلەرگە كوتەرىڭكى كوڭىل-كۇيمەن بارىپ جاتقانى قۋانتتى، - دەيدى وبلىستىق ءماسليحات دەپۋتاتى، سەمەي كولىك كوللەدجىنىڭ ديرەكتورى ايبەك نۇعىماروۆ.

سەمەيدە اۋا-رايىنىڭ قولايسىزدىعىنا قاراماستان حالىقتىڭ جوعارى بەلسەندىلىگى بايقالادى. قالاداعى سايلاۋ ۋچاسكەلەرىندە قازاقستاننىڭ اتاقتى فۋتبولشىلارى دا ءوز تاڭداۋىن جاسادى.

– ءبىز اندرەي كارپوۆيچتىڭ دوستارىنىڭ فۋتبول مەرەكەسىنە سەمەيگە ارنايى كەلگەن ەدىك. بۇگىن ەلىمىز ءۇشىن ايتۋلى كۇن. ءاربىر ازامات ءوزىنىڭ داۋىسى ارقىلى ەلىمىزدە بولاتىن وزگەرىستەرگە ءوز ۇلەسىن قوسۋعا مۇمكىندىگى بار. سوندىقتان ءبىز وسى مۇمكىندىكتى پايدالانىپ، سەمەيدەگى سايلاۋ ۋچاسكەسىندە داۋىس بەردىك، - دەدى فۋتبولدان قازاقستاننىڭ ءۇش دۇركىن چەمپيونى داۆيد لوريا.

سونداي-اق داڭقتى جەرلەستەرىمىز سامات سماقوۆ پەن اندرەي كارپوۆيچ تە ساياسي ناۋقاننان تىس قالمادى.

– كەشە ءبىز تاماشا فۋتبول مەرەكەسىن وتكىزدىك. ناعىز مەرەكە بولدى. اۋا-رايى مەن اتموسفەرا كەرەمەت بولدى. بارلىعى وتە كوڭىلدى ءوتتى. بۇگىن – تاريحي كۇن. كونستيتۋسياعا ەنگىزىلەتىن وزگەرىستەرگە ءاربىر ازامات ءوز ۇلەسىن قوسا الادى. تۋعان قالاما كەلىپ داۋىس بەرگەنىمە قۋانىشتىمىن. ازاماتتىق ۇستانىمنىڭ بولعانى وتە ماڭىزدى، مەن نە قالايتىنىمدى بىلەمىن جانە رەفەرەندۋم بىزگە ۇلكەن مۇمكىندىكتەر سىيلايتىنىن تۇسىنەمىن، - دەپ تۇيىندەدى ويىن اتاقتى فۋتبولشى اندرەي كارپوۆيچ.

بۇگىن التاي اۋدانىندا العاش رەت پاۋەرليفتينگتەن سپورت شەبەرى، حالىقارالىق، رەسپۋبليكالىق، وبلىستىق جارىستاردىڭ قاتىسۋشىسى ءامينا ۆولچەنكو داۋىس بەردى.

– تاۋەلسىز ەلىمىزدىڭ تاريحىنا كوز جۇگىرتسەك، ءبىراز جىلدان كەيىن مىنەكي رەفەرەندۋم وتكىزىلىپ جاتىر. ەلىمىزدىڭ باستى زاڭى رەتىندە كونستيتۋسياعا ايتارلىقتاي وزگەرىستەر مەن تولىقتىرۋلار ەنگىزىلەتىن بولادى. بۇل ازاماتتارعا ءوزىنىڭ ازاماتتىق ۇستانىمىن كورسەتۋگە تاماشا مۇمكىندىك، – دەيدى ەسەپتەيدى ءامينا.