ورتالىق رەفەرەندۋم كوميسسياسى 2022 جىلعى 5 ماۋسىمدا ق ر كونستيتۋسياسىنا وزگەرتۋلەر مەن تولىقتىرۋلار ەنگىزۋ بويىنشا بۇكىلحالىقتىق داۋىس بەرۋگە 7 985 769 ادام قاتىسقانىن، بۇل – رەفەرەندۋمعا قاتىسۋ قۇقىعى بار ادامدار سانىنىڭ 68،05 پايىزىن قۇرايتىنىن ءمالىم ەتتى. بۇل تۋرالى قازاقپارات اقپارات اگەنتتىگى ءمالىم ەتتى.
– وسىلايشا "رەسپۋبليكالىق رەفەرەندۋم تۋرالى" كونستيتۋسيالىق زاڭنىڭ 31-بابىنا سايكەس رەفەرەندۋم وتكىزىلدى دەپ ەسەپتەلەدى. رەسپۋبليكالىق رەفەرەندۋمعا شىعارىلعان كونستيتۋسياعا وزگەرتۋلەر مەن تولىقتىرۋلار ەگەر ولار ءۇشىن وبلىستاردىڭ، رەسپۋبليكالىق ماڭىزى بار قالالاردىڭ جانە استانانىڭ كەمىندە ۇشتەن ەكىسىندە داۋىس بەرۋگە قاتىسقان ازاماتتاردىڭ جارتىسىنان استامى جاقتاپ داۋىس بەرسە، قابىلداندى دەپ ەسەپتەلەدى، – دەدى ق ر ورتالىق رەفەرەندۋم كوميسسياسىنىڭ ءتوراعاسى نۇرلان ءابدىروۆ.
ونىڭ ايتۋىنشا، ەلدىڭ بارلىق وڭىرىندە داۋىس بەرۋگە قاتىسقان ازاماتتاردىڭ 77،18 پايىزى نەمەسە 6 163 516 ادام كونستيتۋسيالىق تۇزەتۋلەردى جاقتاپ داۋىس بەرگەن.
– كونستيتۋسيالىق تۇزەتۋلەرگە قارسى داۋىس بەرگەن ازاماتتاردىڭ سانى داۋىس بەرۋگە قاتىسقانداردىڭ 18،66 پايىزىن قۇرادى نەمەسە 1 490 477 ادام. وسىلايشا، "رەسپۋبليكالىق رەفەرەندۋم تۋرالى" زاڭنىڭ 31، 34-باپتارى نەگىزىندە ەلىمىزدىڭ نەگىزگى زاڭىنا ۇسىنىلعان وزگەرىستەر قابىلداندى دەپ ەسەپتەلىنەدى، – دەدى ول.
43-باپتىڭ 3-تارماعىنداعى "قازاقستان رەسپۋبليكاسىنىڭ پرەزيدەنتى ءوز وكىلەتتىكتەرىن جۇزەگە اسىرۋ كەزەڭىندە ساياسي پارتيادا بولماۋعا ءتيىس" دەگەن وزگەرىسكە تاۋەلسىز ساراپشىلار ەكى ۇدايى باعا بەرەدى. قازاقستاندا پرەزيدەنت سايلاۋىنا كانديداتتار تەك ساياسي پارتيا نەمەسە ۇيىم اتىنان عانا ۇسىنىلاتىندىقتان، پرەزيدەنتتىڭ پارتيادا بولماۋى، ءوزىنىڭ بيلىككە كەلۋىنە جاعداي جاساعان پارتيادان، توپتان تولىقتاي قول ۇزەتىنىن بىلدىرمەيدى دەيدى ولار.
ال 44-باپتىڭ 4-تارماعى ءتىپتى پرەزيدەنتتىڭ قۇزىرەتىن كەڭەيتە تۇسەدى. وعان ساي، پرەزيدەنت سەنات كەلىسىمىن الىپ، كونستيتۋسيالىق سوتتىڭ ءتوراعاسىن، ۇلتتىق بانك، جوعارى سوت كەڭەسىنىڭ ءتوراعالارىن، باس پروكۋروردى، ۇلتتىق قاۋىپسىزدىك كوميتەتىنىڭ ءتوراعاسىن تاعايىنداۋ، ورنىنان الۋ قۇزىرەتىن يەلەنەدى. اتالعان تارماقتىڭ بۇرىنعى رەداكسياسىندا پرەزيدەنتتە كونستيتۋسيالىق سوت (بۇرىنعى كەڭەس - رەد) پەن جوعارى سوت كەڭەسىنىڭ ءتوراعاسىن تاعايىنداۋ، ورنىنان الۋ قۇزىرەتى بولماعان.
سونداي-اق پرەزيدەنت ورتالىق سايلاۋ كوميسسياسىنىڭ ءتوراعاسى مەن ەكى مۇشەسىن، جوعارى اۋديتورلىق پالاتانىڭ (بۇرىنعى ەسەپ كوميتەتى) ءتوراعاسى مەن ءۇش مۇشەسىن تاعايىنداۋ (44-باپتىڭ 7-تارماعى)، مەملەكەتتىك كەڭەسشىنى تاعايىنداۋ (44-باپتىڭ 19-تارماقشاسى)، وبلىستاردىڭ، رەسپۋبليكالىق ماڭىزى بار قالالاردىڭ جانە استانانىڭ اكىمىن تاعايىنداۋ (87-باپتىڭ 4-تارماعى) قۇزىرەتتەرىن ساقتاپ قالدى.
پىكىر قالدىرۋ