الماتى پروكۋراتۋراسى ءسابي ساتۋ تۋرالى قىلمىستىق ءىستى تەرگەۋ جۇمىستارىنىڭ ءمان-جايىن ايتتى، دەپ جازادى كتك تەلەارناسى.

سايتتا سابيىنەن باس تارتقاندارمەن قوسا، اسىراپ العىسى كەلەتىن كەلىنشەكتەردىڭ دە وتىنىشتەرى كوپتەپ ءجۇر. دەگەنمەن قۇزىرلى ورىنداردىڭ قۇرىعىنا ىلىككەن جەلى قىزمەتكەرلەرى ءىزىن جاسىرۋ ءۇشىن پاراقشالارىن ءوشىرىپ ۇلگەرگەن. زاڭسىز ارەكەتكە بارعانداردىڭ ءىسى ەندى سوتتا قارالماق.

انىقتالعانداي، سايت 2013 جىلى تىركەلىپتى. ءبىراق ەلدە جۇمىس جۇرگىزگەنىنە جارتى جىل عانا بولعان. سونىڭ وزىندە جاسىرىن ارەكەتىن ءساتتى جۇرگىزگەن. ساۋداعا تۇسكەندەردىڭ دەنى – 1 جاسقا دەيىنگى بالالار. ال ءوز نارەستەسىنەن جەرىپ، ساۋداعا سالعاندار – 20 بەن 35 جاس ارالىعىنداعى ايەلدەر. قولعا تۇسكەن ەكى كەلىنشەكتىڭ ءبىرى الماتى قالاسىنان بولسا، ەكىنشىسى تۇركىستان وبلىسىنىڭ تۋماسى ەكەن.

– ءبىرىنشىسى ءسابيدى باسقا اتا-انالاردىڭ قولىنا بەرگەن فاكتى انىقتالدى. ەكىنشى فاكتى بويىنشا دۇنيەگە اكەلگەن انا بالانى باسقا اتا-اناعا بەرۋدەن باس تارتتى. ونىڭ ءوز اتا-انالارى باعىپ قارايتىن بولدى. قازىرگى تاڭدا الاتاۋ اۋدانى بويىنشا سابيلەردى ساتۋ يا بولماسا ساتىپ الۋ فاكتىلەرى انىقتالعان جەلى اشكەرەلەنگەن بولاتىن. ءبىزدىڭ ۇسىنىسىمز تولىعىمەن قاناعاتتاندىرىلدى. قازىرگى تاڭدا ول سايت توقتاتىلدى، – دەيدى الاتاۋ اۋدانىنىڭ پروكۋرورى ءىزباسار ماساقبايەۆ.