​11 مامىردا الماتى قالاسىنىڭ الاتاۋ اۋدانىندا ءۇش قاباتتى جاتاقحانا ورتەندى، سونىڭ سالدارىنان 48-گە جۋىق ادام باسپاناسىز قالدى. وسى قيىن شاقتا ماحينۋر يسرايلوۆانىڭ باسشىلىعىمەن قحا انالار كەڭەسى بىردەن ءۇن قاتىپ، كومەك قولىن سوزدى. وسى رەتتە شەشەن، تۇرىك، ۆەنگر، داعىس، بەلورۋس، ۇيعىر، تاتار، كورەي، گرەك، پولياك، روما قاۋىمداستىعى، كۇرد بىرلەستىكتەرى انالار كەڭەسىنىڭ مۇشەلەرى ۇلكەن جۇمىس اتقاردى.

وقىس وقيعا كەزىندە ءورت سوندىرۋشىلەر كەلگەنگە دەيىن ادامدار مۇمكىندىگىنشە قاشىپ، كەيبىرەۋلەر ەكىنشى قاباتتان سەكىرىپ كەتكەن. ءورتتى 58 قۇتقارۋشى مەن 15 ارنايى ماشينا ءسوندىردى. جاتاقحانا تۇرعىندارى ۋاقىتشا جەرگىلىكتى مەكتەپتىڭ سپورتزالىنا ورنالاستىرىلدى. زارداپ شەككەندەردىڭ اراسىندا جۇكتى ايەلدەر مەن بالالار دا بار.

ورتتەن كەيىنگى العاشقى كۇننەن باستاپ كومەككە "ۆايناح" شەشەن قوعامدىق-مادەني ورتالىعىنىڭ ءتوراعاسى راحمان يسلاموۆ، شەشەن ورتالىعى انالار كەڭەسىنىڭ ءتوراعاسى رازيە ماۆساروۆا كەلىپ، ادامدارعا كيىم، تاماق جانە باسقا دا قاجەتتى زاتتار بەردى.

بۇگىنگى كۇنگە دەيىن انالار كەڭەسى الەۋمەتتىك جەلىلەر مەن چاتتاردا بولعان وقيعالار تۋرالى اقپاراتتى جىبەرە وتىرىپ، زارداپ شەككەندەرگە قولداۋ كورسەتۋگە بەي-جاي قارامايتىنداردى يگى ىسكە بەلسەندى تۇردە شاقىرادى. قالانىڭ بارلىق ايماقتارىنان ادامدار جاۋاپ بەرىپ، مۇمكىندىگىنشە قاجەتتى زاتتاردى اكەلىپ جاتىر.

انالار كەڭەسى زارداپ شەككەندەردى ۋاقىتشا ۇستاۋعا، اتاپ ايتقاندا تۇرۋعا، تاماقتانۋعا جانە باسقا دا قاجەتتى شىعىندارعا جۇمسالاتىن اقشا سوماسىن جينادى. ولاردىڭ اراسىندا جۇكتى ايەلدەردىڭ دە بار ەكەنىن ەسكەرە وتىرىپ، ولاردى پەرزەنتحانادا قاجەتتى زاتتارمەن قامتاماسىز ەتۋ، ال بالالارعا مەكتەپ فورماسى مەن كەرەك-جاراقتارىن ساتىپ الۋ تۋرالى شەشىم قابىلداندى.

الماتى قالاسى انالار كەڭەسىنىڭ ءتورايىمى ماحينۋر يسرايلوۆا اتاپ وتكەندەي، اسىرەسە، بالالار مەن جۇكتى ايەلدەر زارداپ شەگىپ جاتقاندا، بۇل زارداپتاردى كورۋ وتە وكىنىشتى.

– بۇل جاعدايدا انالار كەڭەسى شەتتە قالمادى، سوندىقتان ءبىز ءقازىر ورتاق كۇشتەرمەن بۇل ادامداردى قولداۋعا جانە مۇمكىندىگىنشە ولارعا كومەكتەسۋگە تىرىسامىز. كومەككە ءاردايىم ءۇن قوساتىن ەتنومادەني بىرلەستىكتەرىمىزگە العىس ايتامىن، – دەدى ول.

بۇل – قازاقستان حالقى اسسامبلەياسى كوپتەگەن جىلدار بويى جۇرگىزىپ كەلە جاتقان دوستىق پەن ىنتىماقتاستىقتىڭ جارقىن مىسالدارىنىڭ ءبىرى. اسسامبلەيا – ءان، بي جانە مەرەكە عانا ەمەس، سونىمەن قاتار ادامدارعا كومەك، مورالدىق جانە ماتەريالدىق قولداۋ جانە ەڭ باستىسى نازار اۋداراتىن ورتا ەكەنىن كورسەتە ءبىلدى.

الماتى قالاسى "قوعامدىق كەلىسىم" مەكەمەسىنىڭ باسپا ءسوز قىزمەتى