ۋكراينانىڭ ەكىنشى پرەزيدەنتى لەونيد كۋچما ۆۆس-گە بەرگەن سۇحباتىندا رەسەيدىڭ ۋكرايناعا باسقىنشىلىعىنىڭ قالاي اياقتالاتىنى كوپ نارسەنى شەشەتىنىن ايتتى.
ول قازىرگى ۋاقىتتا ءۇشىنشى دۇنيەجۇزىلىك سوعىس باستالۋدىڭ از-اق الدىندا تۇرعان بولۋى مۇمكىن دەپ سانايدى. ونىڭ پىكىرىنشە، ەگەر ۋكراينا رەسەيگە تويتارىس بەرسە، وندا پۋتين وسىمەن توقتايدى. ەگەر ۋكراينا جەڭىلەتىن بولسا، وندا كرەمل اسكەري اگرەسسيا ارقىلى گەوگرافياسىن كەڭەيتۋدى جالعاستىرادى.
لەونيد كۋچما ەكىنشى سەناريي جۇزەگە اسا قالسا، رەسەيدەن ءقاۋىپ ءبىرىنشى كەزەكتە ليتۆا مەن پولشاعا ەمەس، ناتو-عا كىرمەيتىن پوستكەڭەستىك ەلدەرگە تونەدى دەگەن ويدا.
"ماسكەۋدىڭ مولدوۆاعا، سولتۇستىك قازاقستانعا، گرۋزياعا دوق كورسەتۋى ادەتتەگى جاعدايعا اينالىپ بارادى. رەسەي وزىنەن السىزدەرگە عانا ءتىسىن باتىرادى. ال ناتو-عا سوعىس اشپايدى. اسىرەسە بۇگىنگىدەي اسكەرى السىرەگەن شاقتا. جاي سوعىستا ناتو رەسەي ارمياسىن تاس-تالقان ەتەدى، يادرولىق سوعىستا جوق قىلادى. پۋتين نە ۇتىلىپ تىناتىن، نە ءولىپ تىناتىن سوعىستى اشا ما؟ ەسى دۇرىس ادامنىڭ جاۋابى ايتپاسا دا بەلگىلى. ءبىراق ول..." دەگەن لەونيد كۋچما ءسوزىنىڭ اياعىن جالعاستىرمادى.
سونداي-اق ول رەسەي ستراتەگيالىق يادرولىق قارۋدى تەك وزىنە قاتەر تونگەن جاعدايدا، ءارى تەك اقش-قا قارسى قولدانۋى مۇمكىن ەكەنىن، الايدا ۋكرايناعا قارسى ۇرىستا ءپۋتيننىڭ ساياسي پوزيسيالارىنا ءقاۋىپ تونەتىندەي جاعداي تۋسا، تاكتيكالىق يادرولىق قارۋدى قولدانۋدان تايىنبايتىنىن جەتكىزدى.
"وندا ۋكراينانىڭ جاعدايى كۇردەلەنە تۇسەدى. بۇنداي جاعدايدا ءپۋتيندى باتىس ەلدەرى عانا توقتاتا الادى" دەيدى ول.
بۇعان دەيىن رەسەيدىڭ ەكس-پرەزيدەنتى، ءقازىر قاۋىپسىزدىك كەڭەسى ءتوراعاسىنىڭ ياعني ءپۋتيننىڭ ورىنباسارى بولىپ وتىرعان دميتريي مەدۆەديەۆتىڭ "ۆكونتاكتە" جەلىسىندەگى رەسمي اككاۋنتىندا "كييەۆتەن كەيىن قازاقستاندى باسىپ الامىز" دەگەنگە ەمەۋرىن تانىتقان جازبا جاريالانىپ، ۇزاماي وشىرىلگەن. ونىڭ كومەكشىسى مەدۆەديەۆ مۇنداي جازبا جاريالاماعانىن، ونىڭ پاراقشاسىن حاكەرلەپ بۇزعانىن حابارلاعان. الايدا قازاقستاندىقتار بۇعان سەنبەيتىنىن، وشىرىلگەن جازبا بۇگىنگى رەسەي بيلىگىنىڭ پيعىلىن ءدال كورسەتەتىنىن ايتادى.
پىكىر قالدىرۋ