پرەزيدەنت قاسىم-جومارت توقايەۆ 1 قىركۇيەكتە پارلامەنت پالاتالارىنىڭ بىرلەسكەن وتىرىسىندا قازاقستان حالقىنا جولداۋىن جاريالايدى. بۇل تۋرالى اقوردانىڭ باسپا ءسوز قىزمەتى حابارلادى.

بۇل جولداۋ پرەزيدەنتتىڭ وسى جىلعى ەكىنشى جولداۋى بولماق. توقايەۆ العاشقى جولداۋىن 16 ناۋرىزدا جاريالاعان. قۇجات نەگىزىنەن سۋپەرپرەزدەنتتىك جۇيەدەن باس تارتۋعا ارنالعان باستامالاردان تۇردى. اتاپ ايتقاندا پرەزيدەنتتىڭ پارتياعا مۇشە بولۋىنا زاڭ جۇزىندە تىيىم سالۋ، ورتالىق سايلاۋ كوميسسياسى ءتوراعاسى مەن مۇشەلەرى، ەسەپ كوميتەتى، كونستيتۋسيالىق كەڭەس مۇشەلەرىن پارتيا قۇرامىنان شىعارۋ، اكىمدەرگە پارتيا فيليالدارىن باسقارۋعا تىيىم سالۋ، پرەزيدەنتتىڭ جاقىن تۋىستارىنا ساياسي لاۋازىمدار مەن كۆازيمەملەكەتتىك قۇرىلىمداردى باسقارۋعا تىيىم سالۋ، ءماجىلىستىڭ 70 پايىزىن پروپورسيونالدىق (پارتيالىق ءتىزىم)، 30 پايىزىن ماجوريتارلىق جۇيە (ءوزىن-وزى ۇسىنۋ) بويىنشا جاساقتاۋ سياقتى ماسەلەلەر كوتەرىلگەن. پرەزيدەنت تاپسىرماسىن جۇزەگە اسىرۋ اياسىندا جالپىحالىقتىق رەفەرەندۋم ءوتىپ، ونىڭ قورىتىندىسى بويىنشا كونستيتۋسياسىنىڭ 33-بابىنا 56 وزگەرىس ەنگىزۋ ماقۇلدانعان.

بيلىك وزگەرىستەر پاكەتىنە "جاڭا قازاقستاندى" قۇرۋعا باعىتتالعان ساياسي رەفورما، پرەزيدەنتتىڭ قۇزىرەتىن شەكتەپ، پارلامەنتتى كۇشەيتەتىن قادام دەگەن مازمۇندا باعا بەرگەن. الايدا مۇنداي مالىمدەمەلەرگە قارسى ءۋاج ايتقان ساراپشىلار دا از ەمەس. ءتىپتى قابىلدانعان وزگەرىستەردە پرەزيدەنت قۇزىرەتىن شەكتەيتىن باپتار كوپ ەمەستىگىن، باسىم فۋنكسياسى وزگەرىسسىز قالىپ، ءتىپتى كەي تۇستا كۇشەيەتىنىن اڭعارۋعا بولادى.

ماسەلەن، 44-باپتىڭ 4-تارماعىنا ساي، پرەزيدەنت سەنات كەلىسىمىن الىپ، كونستيتۋسيالىق سوتتىڭ ءتوراعاسىن، ۇلتتىق بان­ك، جوعارى سوت كەڭەسىنىڭ ءتوراعالارىن، باس پروكۋروردى، ۇلتتىق قاۋىپسىزدىك كومي­تەتىنىڭ ءتوراعاسىن تاعايىنداۋ، ورنىنان الۋ قۇزىرەتىن يەلەنەدى. اتالعان تارماقتىڭ بۇرىنعى رەداكسياسىندا پرەزيدەنتتە كونستيتۋسيالىق سوت (بۇرىنعى كەڭەس - رەد) پەن جوعارى سوت كەڭەسىنىڭ ءتوراعاسىن تاعايىنداۋ، ورنىنان الۋ قۇزىرەتى بولماعان.