جۋرناليست قازاق تىلىنە بەت بۇرا باستاعانداردىڭ ءبىرى الماتىداعى ۆوزنەسەنسك فەدەرالدىق شىركەۋىنىڭ اكەيى 36 جاستاعى ياكوۆ ۆورونستوۆپەن تىلدەسكەن.
ياكوۆ ۆورونستوۆ مەكتەپ پەن جوعارى وقۋ ورنىندا قازاق ءتىلىن وقىعانىمەن، كۇندەلىكتى ومىردە قاجەتى بولمايدى دەپ ويلاعانىن، الايدا رەسەي ۋكرايناعا باسىپ كىرگەن 24 اقپان ءبارىن وزگەرتكەنىن ايتادى.
– 24 اقپان قاتتى سوققى بولدى. ۇلتى ورىس، ورىس ادەبيەتىن جاقسى ءبىلىپ، ورىس فيلاسوفياسىنان ءتورت جىل سەمينار جۇرگىزگەن ادام رەتىندە فيلوسوفيالىق ميفتەر مەن يمپەريالىق فانتازيانىڭ ءقاۋپىن سەزىنەتىنمىن. قۇبىجىق ورىس دۇنيەتانىمىنىڭ تەرەڭ قاتپارىندا بۇعىپ جاتىپتى. ەندى ول فورماعا يە بولدى. مەن بۇدان ءوزىم مەن وتانىم قازاقستان ءۇشىن ءقاۋىپتى كورىپ تۇرمىن، – دەگەن ول شوۆينيزم مەن ميليتاريزم سيپاتى بار ورىس ادەبيەتىنەن باس تارتۋعا شەشىم قابىلداپ، قازاقشا ۇيرەنۋدى قولعا العانىن جەتكىزگەن.
قازىرگى ۋاقىتتا ياكوۆ اكەي Facebook پاراقشاسىندا بيبليا ۇزىندىلەرىن، ونداعى ولەڭدەردى قازاقشا جاريالاپ، ءوز بەتىنشە قازاق ءتىلىن ۇيرەنىپ ءجۇر.
جۋرناليست ۋكراينادا سوعىس باستالعالى قازاق ءتىلىن ۇيرەنۋشىلەر سانى ارتقانىن دايەكتەۋ ءۇشىن قازاق ءتىلى مەن مادەنيەتىن دامىتۋ، تانىمال ەتۋدى كوزدەيتىن Instagram جەلىسىندە Qazaq Grammar دەگەن اتپەن قۇرىلعان پاراقشا سوعىس باستالعالى جاڭا 5 مىڭ جازىلۋشىمەن تولىققانىن اتاپ وتكەن.
بۇدان بولەك ۋكرايناداعى سوعىستى ايىپتاپ بەينەۇندەۋ جولداعان اقمولا وبلىسىندا تۋعان ەتنيكالىق ورىس الەكسەي سكالوزۋبوۆتىڭ كەيسىن كەلتىرەدى.
الەكسەي بەينەۇندەۋدە وتانى قازاقستان ەكەنىن، رەسەي باسقىنشىلىعىن ايىپتايتىنىن ايتىپ، قازاقستانداعى وزگە ورىستاردى دا ۇستانىمىن بىلدىرۋگە شاقىرادى. ارتىنشا الماتىعا كوشىپ كەلىپ، قازاقشا ۇيرەنۋ ءۇشىن قازاقشا سويلەيتىندەر ورتاسىن قۇرۋ نيەتىمەن ارنايى كلۋب قۇرعان. بۇگىندە كلۋبقا 300-دەي ادام مۇشە اتانىپ، "باتىل بول" دەگەن اتپەن جۇمىس ىستەپ جاتىر. وعان قازاقشا بىلمەيتىن ءتۇرلى ۇلت وكىلدەرى كەلەدى. اراسىندا قازاقشا بىلمەيتىن قازاقتار دا از ەمەس.
الەكسەي سكالوزۋبوۆ كلۋبقا قوسىلۋشى جاڭا مۇشەلەردىڭ باسىم كوپشىلىگى بۇگىندە رەسەيلىكتەردى قۇراپ وتىرعانىن جەتكىزدى. ولاردىڭ ءبىرى داعىستاننان كەلگەن اسقار ەسىمدى جىگىت. ول ءوزى ءۇشىن تۇراتىن ەلدىڭ ءتىلىن ءبىلۋ ماڭىزدى ەكەنىن، قازاقشا كەمى امانداسىپ، ادامدارمەن سويلەسە الاتىنداي دەڭگەيدە ۇيرەنگىسى كەلەتىننىن ايتادى.
