كارىم ءماسىموۆ پەن ونىڭ بۇرىنعى ورىنباسارلارىنىڭ ءىسى سوتقا جەتتى. ۇقك باسپا ءسوز قىزمەتىنىڭ حابارلاۋىنشا، قىلمىستىق ءىس استانا قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنا جولدانعان.

ايىپتالۋشىلار ك.ق. ءماسىموۆ (ۇقك بۇرىنعى ءتوراعاسى) جانە ا.ت. سادىقۇلوۆ (ۇقك ءتوراعاسىنىڭ بۇرىنعى ورىنباسارى) مەملەكەتكە وپاسىزدىق جاساۋ (قك 175-بابىنىڭ 1-بولىگى)، بيلىكتى كۇشپەن باسىپ الۋ (قك 179-بابىنىڭ 3-بولىگى)، اۋىر زارداپتارعا اكەپ سوققان بيلىك پەن لاۋازىمدىق وكىلەتتىگىن وزىنە جانە باسقالارعا پايدا مەن ارتىقشىلىقتار الۋ ماقساتىندا اسىرا پايدالانۋ (قك 362-بابى 4-بولىگىنىڭ 3-تارماعى) دەگەن ايىپتار كۇدىككە ءىلىنىپ، ىستەرى سوتقا جىبەرىلگەن.

د.ە.ەرعوجين (ۇقك ءتوراعاسىنىڭ بۇرىنعى ورىنباسارى) بيلىكتى كۇشپەن باسىپ العانى (قك 179-بابىنىڭ 3-بولىگى)، اۋىر زارداپتارعا اكەپ سوقتىرعان بيلىك پەن لاۋازىمدىق وكىلەتتىكتەردى وزىنە جانە باسقالارعا پايدا مەن ارتىقشىلىقتار الۋ ماقساتىندا اسىرا پايدالانعانى ءۇشىن ايىپتالۋدا (قك 362-بابى 4-بولىگىنىڭ 3-تارماعى).

م.س. وسيپوۆكە (ۇقك ءتوراعاسىنىڭ بۇرىنعى ورىنباسارى)، د.م. اكيپوۆقا (ۇقك دەپارتامەنت باستىعىنىڭ بۇرىنعى ورىنباسارى) جانە ن.ك. بەكمۋراتقا (ۇقك-نىڭ بۇرىنعى باسقارما باستىعى) قىلمىستىق كودەكستىڭ 362-بابىنىڭ ءارتۇرلى بولىكتەرى بويىنشا ايىپ تاعىلعان.

قىلمىستىق ءىس "وتە قۇپيا" بەلگىسىمەن تەرگەلگەن جانە سوتتا دا وسى تارتىپتە قارالادى. 

ەسكە سالايىق، ۇلتتىق قاۋىپسىزدىك كوميتەتىنىڭ بۇرىنعى ءتوراعاسى كارىم ماسىموۆكە قاتىستى بيىل 6 قاڭتاردا ۇقك قازاقستان رەسپۋبليكاسى قىلمىستىق كودەكسىنىڭ 175-بابى 1-بولىگىمەن مەملەكەتكە ساتقىندىق دەرەگى بويىنشا سوتالدى تەرگەۋ باستالعان. بيىل ناۋرىزدا باس پروكۋرور بەرىك اسىلوۆ ۇلتتىق قاۋىپسىزدىك كوميتەتىنىڭ بۇرىنعى ءتوراعاسى مەن ونىڭ ءۇش ورىنباسارىنا، ەكى بولىمشە باستىعىنا قاتىستى بىرنەشە ءىس قوزعالىپ، تەرگەلىپ جاتقانىن ايتتى.