ىشكى ىستەر مينيسترلىگى ەل اۋماعىنا قوسالقى بولشەكتەر تۇرىندە اكەلىنىپ، قۇراستىرىلىپ، قازاقستان ازاماتتارىنا ساتىلعان كولىكتەردى دە زاڭداستىرۋ تەتىكتەرى ازىرلەنىپ جاتقانىن ءمالىم ەتتى.

"ءىىم اۆتوكولىكتەردى زاڭداستىرۋ پروسەسىندە تۋىندايتىن پروبلەمالىق ماسەلەلەردى شەشۋ ءۇشىن تالداۋ جۇرگىزۋدە. اتاپ ايتقاندا، زاڭداستىرۋ پروسەسىندە كوبىنە باسقارۋ ورگاندارى وڭ جاقتا ورنالاسقان اۆتوكولىكتەر انىقتالدى، ولار ەل اۋماعىنا قوسالقى بولشەكتەر تۇرىندە اكەلىنىپ، كەيىننەن قازاقستان ازاماتتارىنا ساتىلعان. اتالعان كولىكتەر بويىنشا ىشكى ىستەر مينيسترلىگى مەملەكەتتىك ورگاندارمەن بىرلەسىپ، ولاردى قازاقستان رەسپۋبليكاسىندا باستاپقى تىركەۋدىڭ قۇقىقتىق تەتىكتەرىن ازىرلەدى. ءقازىر زاڭمەن رەسىمدەۋ جۇمىستارى جۇرگىزىلۋدە" دەلىنگەن حابارلامادا.

مينيسترلىك مالىمەتىنشە، شەتەلدەن اكەلىنگەن كولىكتەردى زاڭداستىرۋ باستالعان العاشقى 20 كۇنىندە 27 مىڭعا جۋىق كولىك قۇرالى تىركەۋدەن وتكەن.  تاعى 65 مىڭنان استام اۆتوكولىك الدىن الا تەكسەرۋدەن ءوتىپ، نومىرلىك اگرەگاتتاردى سالىستىرۋعا جانە ودان ءارى تىركەۋگە جىبەرىلگەن.

بۇعان دەيىن ىشكى ىستەر مينيسترلىگى كونسترۋكتور-كولىكتەردى زاڭداستىرۋ تۋرالى مۇلدە ءسوز قوزعالۋى مۇمكىن ەمەستىگىن، ولار جول قوزعالىسىنا ءقاۋىپ توندىرەتىنىن حابارلاعان. ءىىم ورىنباسارى يگور لەپوحا ءتىپتى جينالعان كولىكتەردى بولشەكتەپ ساتىپ جىبەرۋگە كەڭەس بەرگەن. ەندى مىنە، مينيسترلىك ءوز ۇستانىمىنا كەرەعار شەشىم قابىلداعانىن جاريالاپ وتىر.

قازىرگى تاڭدا شەتەلدە ەسەپتەن رەسمي شىعارىلماعان كولىكتەر زاڭداستىرۋ پروسەدۋراسىنان تىس قالىپ وتىر. ولار كولىگىن اكەلگەن ەلگە بارىپ، بۇرىنعى يەسىن تاۋىپ، ەسەپتەن شىعارۋ تىم قىمبات ەكەنىن، ۇكىمەت ءبىر جولعا ولاردىڭ دا كولىگىن زاڭداستىرىپ بەرۋدى سۇراپ ءجۇر.