رەسەيدىڭ "ۆاگنەر" جالدامالى اسكەر جاساعىنا قوسىلعان  قازاقستان ازاماتى ۆيدەو مالىمدەمە جاسادى. ول جەلىدە تاراعان ۆيدەودا رەسەيدىڭ ۋكرايناعا جاساعان شابۋىلىن "ارنايى وپەراسيا" دەپ اتادى.

"مەن ءوز ەركىممەن ارنايى اسكەري وپەراسياعا ۇلەسىمدى قوسۋعا كەلدىم. ماعان بۇل جەر ۇنادى. ۇجىم دا جاقسى، ءوزىمدى تاپقانداي سەزىنەمىن. پسيحيكالىق جاعدايىم جامان ەمەس. مەنى بۇل جەرگە ەشكىم كۇشتەپ اكەلگەن جوق" – دەدى ول.

ەسكە سالا كەتەيىك، 23 جاستاعى مارعۇلان بەكەنوۆ رەسەيدىڭ تومسك قالاسىنا وقۋعا كەتكەن. وسىعان دەيىن بەكەنوۆتىڭ اناسى الميرا بەكەنوۆا ۇلىن "ۆاگنەرگە" الداپ قوسىپ، سوعىسقا اكەتكەنىن ايتقان بولاتىن. ال قازاقستاننىڭ سىرتقى ىستەر مينيسترلىگى مارعۇلان بەكەنوۆ "ۆاگنەر" قاتارىنا ءوز ەركىمەن قوسىلعان دەپ مالىمدەدى.

"ۆاگنەر" – رەسەي پرەزيدەنتى ءپۋتيننىڭ جاقتاسى، رەسەي فەدەراسياسىنىڭ قاھارمانى اتاعىنا يە ەۆگەنيي پريگوجيننىڭ جەكە اسكەري ءبولىمى. "ۆاگنەرلىكتەر" ۋكراينامەن قاتار سيريا مەن افريكا ەلدەرىندەگى سوعىسقا قاتىسىپ جاتىر. ساراپشىلار "ۆاگنەر" توبىنىڭ ارەكەتتەرىن قىلمىسقا جاتقىزادى. پريگوجين ءوزىنىڭ جەكە اسكەري بولىمىنە رەسەي تۇرمەلەرىندە وتىرعانداردى، ورتالىق ازيادان كەلگەن ميگرانتتاردى تارتقان.

ءقازىر "ۆاگنەر" ۋكراينانىڭ باحمۋت قالاسىندا بولىپ جاتقان اۋىر شايقاسقا قاتىسىپ جاتىر. ۋكرايناداعى سوعىستا پريگوجين "اسكەرىنىڭ" كوپ شىعىنعا ۇشىراعانى دا ايتىلادى.