"ءالميساقتان مۇسىلمانبىز" دەيتىن قازاق قوعامىندا جاراپازان ايتۋمەن قاتار ورازا اياقتالعان سوڭ ايت مەيرامىن تويلاۋدىڭ ورنى ەرەكشە. الايدا قازىرگى قاربالاسقان زاماننىڭ ايت تويلاۋى مەن كەشەگى قوناقجاي قازاقتىڭ ايت مەيرامى بىردەي مە؟ وسى سۇراقتىڭ جاۋابىن تابۋ ءۇشىن قازاق ادەبيەتىنە ءۇڭىلىپ كوردىك.
♦قازاقتاردىڭ ومىرىندە، شىنىندا دا، ايتتان ۇلكەن قۋانىش بولمايتىنى راس بولسا راس شىعار. ەرتەڭ ايت دەگەننەن باستاپ قازاق اۋىلدارى "ايت قۇتتى بولسىن" ايتامىز دەپ ەرسىلى–قارسىلى شۇبىرا باستايدى ەكەن. ايتتاعان جۇرت ۇستىنە بار جاقسىسىن كيىپ، استىنا بار جاقسى اتىن مىنەدى ەكەن. سوسىن انا اۋىل، مىنا اۋىلدان توپ–توپ بولىپ شىعىپ، جولعا قاراسىپ، اتاسى ۇلكەن ەڭ سىيلى اۋىلدان باستاپ قىدىرادى ەكەن.
♦ايت كۇنى عارىپ ەكەش عارىپتىڭ ءوزى قىرىق ءۇيدىڭ ەسىگىن اشىپ شىقپاعى شارت كورىنەدى. ول كۇندەرى ءۇي بىتكەن بار دۇنيەسىن جارىققا شىعارادى. ءتور سايىن ادال باقان قۇرىلىپ، وعان سول ۇيدەگى ەڭ اسىل كيىم، اسىل جاعا ىلىنەدى. تەڭدە، كەبەجەدە جاتقان قىمبات جيھازدىڭ ءبارى الىنىپ، جۇرت كوزىنە تۇسەتىن كورنەكتى جەرگە قويىلادى. قازان بىتكەن ەرتەلى–كەش وتتان تۇسپەيدى، كىرگەن–شىققان جۇرت ەرتەلى–كەش ساپىرىلىسادى دا جاتادى. ايت كۇنى قازانى تولماعان ءۇيدىڭ ىرىسى كەم بولماقشى. ايت كۇنى كوزگە تۇسپەگەن دۇنيەنىڭ يگىلىگىڭە بۇيىرماعى ەكى تالاي...
بۇل – قازاق ادەبيەتىنىڭ كلاسسيگى ءابىش كەكىلبايدىڭ "ۇركەر" رومانىنان الىنعان ءۇزىندى. بۇدان اسقان سۋرەتتەۋ بار ما؟ ايت – قۋانىش، ايت – بەرەكە. تاريحتىڭ تار جول، تايعاق كەشۋلەرىندە ايىرىلىپ قالا جازداعان سول قۋانىشىمىز تاۋەلسىزدىكپەن قايتا ورالدى. ءبىراق ءبىز باياعى قازاقتارداي قۋانا الدىق پا؟!
ايتىڭىز قابىل بولسىن!
پىكىر قالدىرۋ