الاياقتاردىڭ كەسىرىنەن بانككە قارىز بولىپ قالعان قازاقستاندىقتاردىڭ كرەديتى كەشىرىلۋى مۇمكىن. بۇل تۋرالى قارجى نارىعىن رەتتەۋ جانە دامىتۋ اگەنتتىگىنىڭ ءتوراعاسى مادينا ءابىلقاسىموۆا مالىمدەدى.
"قازىرگى تاڭدا ەكىنشى دەڭگەيلى بانكتەرمەن، مەملەكەتتىك ورگاندارمەن زارداپ شەككەن ازاماتتارعا شىعىندى قايتارۋ بويىنشا زاڭنامالىق تەتىك ازىرلەنىپ جاتىر. ياعني بۇل كرەديتتىڭ الاياقتىق جولمەن راسىمدەلۋى نەمەسە قارىز الۋشىنىڭ ءوز قاراجاتىنىڭ شوتتان الىنۋى بولۋى مۇمكىن. ەگەر سوت شەشىمى بولماسا، قارجى ۇيىمى شىعىندى وتەمەيدى"، - دەدى ءابىلقاسىموۆا ءماجىلىس كۋلۋارىندا.
ايتۋىنشا، الاياقتىڭ قۇربانى بولعان ازامات پوليسياعا ارىزدانۋى كەرەك. قۇقىق قورعاۋ ورگاندارى الاياقتىق بويىنشا تەرگەۋ باستالدى دەگەن قۇجاتتى بەرگەننەن كەيىن، بانك مىندەتتى تۇردە ول نەسيە بويىنشا سىياقى، ايىپپۇل ەسەپتەۋدى توقتاتادى.
سونىمەن قاتار ەگەر سالىمشى بانكتىڭ اقپاراتتىق قاۋىپسىزدىك تالاپتارىن ساقتاماۋىنا بايلانىستى شوتتاعى اقشاسىنان ايىرىلسا، بانك ونىڭ اقشاسىن قايتارۋعا مىندەتتى بولادى.
"ەگەر بانكتىڭ اقپاراتتىق قاۋىپسىزدىگى نەمەسە اقپاراتتىق جۇيەلەرى سالىمشىنىڭ شوتىنان اقشا شەشۋگە مۇمكىندىك بەرسە، ياعني بۇل جەردە سالىمشىنىڭ كىناسى جوق، ءبىز زاڭنامالىق دەڭگەيدە بانكتى شىعىندى قايتارۋعا مىندەتتەۋدى جوسپارلاپ وتىرمىز"، - دەدى ءابىلقاسىموۆا.
دەرەككوز: sputnik.kz
پىكىر قالدىرۋ