Facebook-تە قىتايدىڭ ينتەرنەت-الاڭدارىندا قازاقستاندىق اۋىل شارۋاشىلىعى القاپتارى اشىق ساتىلىپ جاتقانى تۋرالى اقپارات جاريالاندى. ونى اۋىل شارۋاشىلىعى مينيسترلىگى جوققا شىعاردى.

ق ر اشم جەر رەسۋرستارىن باسقارۋ كوميتەتىنىڭ ءتوراعاسى مۇرات تەمىرجانوۆ جەلىدە تارالعان قازاقستاندىق جەرلەردىڭ ساتىلۋى تۋرالى اقپارات شىندىققا جاناسپايتىنىن ايتتى.

«قازاقستان رەسپۋبليكاسى جەر كودەكسىنىڭ 24-بابىنىڭ تالاپتارىنا سايكەس، شەتەلدىكتەر، ازاماتتىعى جوق ادامدار، شەتەلدىك زاڭدى تۇلعالار، شەتەلدىك قاتىسۋى بار قازاقستان رەسپۋبليكاسىنىڭ زاڭدى تۇلعالارى، حالىقارالىق ۇيىمدار، حالىقارالىق قاتىسۋى بار عىلىمي ورتالىقتار، سونداي-اق قانداستار اۋىل شارۋاشىلىعى ماقساتىنداعى جەر ۋچاسكەلەرىن جەكە مەنشىك نەمەسە جەر پايدالانۋ قۇقىعىمەن يەلەنە المايدى، ياعني اۋىل شارۋاشىلىعى ماقساتىنداعى جەر ۋچاسكەلەرiن شەتەلدىكتەرگە بەرۋگە قاتاڭ تىيىم سالىنعان. سونىمەن قاتار، اۋىل شارۋاشىلىعى ماقساتىنداعى جەر ۋچاسكەلەرىن شەتەلدىكتەرمەن نەمەسە ازاماتتىعى جوق ادامدارمەن نەكەدە تۇرعان (ەرلى-زايىپتى) قازاقستان رەسپۋبليكاسىنىڭ ازاماتتارىنا جەكە مەنشىككە جانە جەر پايدالانۋ قۇقىعىمەن بەرۋگە جول بەرىلمەيدى.

الەۋمەتتىك جەلىدە جاريالانعان جۇڭگو ەلىنىڭ سايتىنداعى قازاقستان اۋماعىنداعى جەرلەردىڭ ساتىلاتىندىعى تۋرالى اقپارات جالعان ەكەندىگىن مالىمدەيمىز»، – دەپ جازدى ول ءوزىنىڭ Facebook پاراقشاسىندا.