قازاقستاندا جاڭا مەرەكە پايدا بولدى. 2 اقپان ۇلتتىق باسىلىم كۇنى بولىپ بەكىتىلدى. بۇل تۋرالى اقپارات جانە قوعامدىق دامۋ ءمينيسترى دارحان ءقادىرالى Facebook-پاراقشاسىندا جازدى.

"ءقادىرلى دوستار! جاعىمدى جاڭالىعىمىز بار. 2 اقپان ۇلتتىق باسىلىم كۇنى بولىپ بەكىتىلدى. باستاۋىندا احمەت بايتۇرسىن ۇلى، ءاليحان بوكەيحانوۆ، ءمىرجاقىپ دۋلات ۇلى سەكىلدى ۇلت زيالىلارى تۇرعان "قازاق" گازەتىنىڭ العاشقى ءنومىرى وسىدان 110 جىل بۇرىن، 2 اقپان كۇنى جارىق كورگەنى بەلگىلى. الاش ارداقتىلارىنىڭ قولتاڭباسى قالعان گازەت ۇلتتىق رەنەسسانستىڭ قاينار كوزىنە اينالىپ، حالقىمىزدىڭ اقىل-ويىن، سانا-سەزىمىن بولەك ارناعا بۇردى. مەملەكەت باسشىسى بۇعان دەيىن قازاق راديوسىنىڭ 100 جىلدىعى اياسىندا 1 قازاندى راديو قىزمەتكەرلەرى كۇنى دەپ رەسمي تۇردە بەكىتكەن ەدى. ەندى مىنە، جۋرناليستەر قاۋىمى ءۇشىن تاعى ءبىر اتاۋلى كۇن بەلگىلەنىپ وتىر. باسپا ءسوز سالاسىندا ەسەلى ەڭبەك ەتىپ، قالام تەربەپ جۇرگەن بارشا ارىپتەستەرىمىزدى ۇلتتىق باسپا ءسوز كۇنىنىڭ بەلگىلەنۋىمەن قۇتتىقتايمىن!" - دەپ جازدى ول.