الماتى تۇرعىندارى قالا اكىمىنەن مەگاپوليستىڭ ەكى نەگىزگى داڭعىلى نەلىكتەن ءبىر مەزگىلدە جوندەۋگە جابىلعانىن سۇرادى.
بۇل ماسەلە ەربولات دوسايەۆتىڭ بوستاندىق اۋدانىنىڭ تۇرعىندارىمەن كەزدەسۋىندە كوتەرىلدى.
"ءقازىر بارلىق الماتىلىقتاردى تولعاندىراتىن سۇراق، نەلىكتەن ەكى نەگىزگى جول - ءال-فارابي مەن اباي كوشەلەرى ءبىر مەزگىلدە جابىلدى؟ نەگە اينالما جولدار نەمەسە باسقا قوزعالىس باعىتتارى جاسالمادى؟ ەڭ ماڭىزدىسى، مۇنىڭ ءبارىن قاشان اياقتايدى؟" – دەپ سۇرادى قالا تۇرعىندارى.
وسىعان جاۋاپ رەتىندە ەربولات دوسايەۆ بۇل داڭعىلداردىڭ 2010 جانە 2012 جىلدان بەرى جوندەۋ كورمەگەنىن ەسكە سالدى. اكىمنىڭ ايتۋىنشا، بيىل جاز مەزگىلى اسفالتتاردىڭ جول قوزعالىسىنا توتەپ بەرۋ ۋاقىتىنىڭ سوڭعى كەزەڭى ەكەن.
"ەگەر مەنىڭ شەشىمدەرىم بىرەۋلەرگە قولايسىزدىق تۋعىزسا، بوستاندىق اۋدانىنىڭ تۇرعىندارىنان عانا ەمەس، بۇكىل الماتىنىڭ تۇرعىندارىنان ءوزىم جانە اكىمدىك اتىنان كەشىرىم سۇراعىم كەلەدى. ءبىراق وكىنىشكە قاراي، ۇلكەن مەگاپوليستەردى دامىتۋ ماسەلەلەرى، تەك الماتى عانا ەمەس، جول ينفراقۇرىلىمىن رەتكە كەلتىرۋگە بايلانىستى بولىپ وتىر.
نەلىكتەن ءبىز بيىل ەكى نەگىزگى جولدى باستادىق؟ بۇرىنعى سوزىمدە ايتقانىمداي، ءال-فارابي كوشەسى 2010 جىلدان بەرى، اباي كوشەسى 2012 جىلدان بەرى جوندەۋ كورمەگەن. كادىمگى كۇردەلى جوندەۋ سيكلى بەس جىلدان، كەيدە جەتى جىلعا دەيىن. ءبىز ەكى كۇردەلى جوندەۋ كەزەڭىن وتكىزىپ الدىق. مامانداردىڭ ايتۋىنشا، بيىل وسى ەكى جولدى جاساماعانىمىزدا، قىستا قينالاتىن ەدىك. كەلەسى جىلعى كوكتەمدە جولدىڭ ساپاسىنا قاتىستى بىرنەشە ماسەلە بار"، - دەدى دوسايەۆ.
ول وسى داڭعىلدارداعى جوندەۋ جۇمىستارى كەزىندە اينالما جولداردىڭ بولماۋىنا دا توقتالدى.
"ەسكەرتۋلەرىمىزدى ەسكەرىپ، اينالما جولمەن ءجۇرىپ، كومەكتەسكەن بارلىق باسقا تۇرعىندارعا العىسىمدى بىلدىرەمىن، بۇل دا ۇلكەن اتسالىسۋ، قازىرگى جاعدايدى تۇسىنگەنى ءۇشىن شىن جۇرەكتەن العىس ايتامىن.
بۇگىندە نەگىزگى كولىك كەپتەلىسى ءال-فارابي – جاروكوۆ كوشەلەرىندە باستالدى. ەگەر سىزبەن مەن جۇرەتىن جول ينفراقۇرىلىمىنا قاراساڭىز، وندا دۋلاتي كوشەسىندە اپاتتىق جولدار جوق جانە ءبىز كەرى قوزعالىس جاساي المايمىز. روزىباكييەۆ پەن جاروكوۆ كوشەلەرىندە جول ايرىعى قارسى جولاقتا قوزعالىستى دۇرىس ۇيىمداستىرۋعا مۇمكىندىك بەرمەيدى. سوندىقتان كەشە العاشقى مۇمكىندىك تۇسكەن بويدا ءبىز سىرعابەكوۆتەن ەسەنتاي كوپىرىنە دەيىنگى كەرى قوزعالىستى اشىپ، نەگىزگى جۇكتەمەنى الىپ تاستادىق. ءبىز ءال-فارابيدىڭ وڭتۇستىك جاعىن جوندەۋ كەزىندە ساباق الدىق جانە وسى تاجىريبەنى سولتۇستىك بولىگىندە دە ەسكەرەتىن بولامىز"، - دەدى الماتى اكىمى.
سونداي-اق ەربولات دوسايەۆ ءال-فارابي مەن اباي داڭعىلدارىنداعى كولىك قوزعالىسىن ساعات سايىن جەكە ءوز باقىلاۋىندا ۇستايتىنىن مالىمدەدى