استانادا ينتەرنەت دۇكەن ارقىلى سينتەتيكالىق ەسىرتكى ساتقان كۇدىكتى ۇستالىپ، ۋۇي-عا قاماۋعا الىندى، – دەپ حابارلايدى Polisia.kz.

ەلوردالىق پوليسەيلەر استانادا سينتەتيكالىق ەسىرتكىنى وتكىزۋگە قاتىسى بار ينتەرنەت دۇكەندەردى جويۋ بويىنشا جۇمىس جۇرگىزىپ جاتىر. زاماناۋي جاستار اراسىندا جاڭادان شىققان سينتەتيكالىق ەسىرتكى مەن پسيحيكالىق بەلسەندى زاتتاردى قولدانۋ سانگە اينالىپ، وكىنىشكە وراي كەڭىنەن ناسيحاتتالۋدا.

بۇنى ەسىرتكى دەلدالدارى پايدالانىپ، ينتەرنەت رەسۋرتارى ارقىلى تىيىم سالىنعان زاتتاردى جاپپاي وتكىزۋدە. پوليسەيلەر جەدەل-ىزدەستىرۋ ءىس-شارالارىن جۇرگىزۋ بارىسىندا قابانباي باتىر كوشەسىندە تىكەلەي بايلانىسسىز ينتەرنەت دۇكەن ارقىلى ەسىرتكىنى وتكىزگەن 19 جاستاعى استانالىق جاس جىگىتتى انىقتادى.

ەسىرتكىنى وتكىزۋشى حالىق كوپ جينالاتىن ورىندارعا، ورتالىق ساياباققا جاسىرىپ قويىپ كەتۋ ارقىلى ەسىرتكىنى بەلگىلى ءبىر جەرلەرگە قالدىرىپ وتىرعان. جەدەل-تەرگەۋ ءىس-شارالارىن جۇرگىزۋ بارىسىندا جاس جىگىت قىلمىس جاساعانىن مويىنداعان جانە ينتەرنەت دۇكەننىڭ جۇمىس جۇيەسى تۋرالى جانە ول جەردەن الاتىن زاڭسىز سىياقى تۋرالى ايتىپ بەرگەن. جەكە ءتىنتۋ بارىسىندا ودان ىشىندە سينتەتيكالىق ەسىرتكىسى بار 40 تۇيىنشەك تابىلىپ، تاركىلەندى. الىنعان مەفەدرون سنتەتيكالىق ەسىرتكىنىڭ جالپى سالماعى 40 گرامم نەمەسە 150 رەت قولدانىلاتىن دوزا. قىلمىستىق ءىس قوزعالدى.

19 جاستاعى ەلوردا تۇرعىنى استانا قالاسى پد ۋاقىتشا ۇستاۋ يزولياتورىنا قامالدى. ەسىرتكىنى وتكىزۋگە بىرگە قاتىسقانداردى انىقتاۋ جانە ۇستاۋ بويىنشا جەدەل-ىزدەستىرۋ ءىس-شارالارى جۇرگىزىلىپ جاتىر.