جۋرناليست ميحايل كوزاچكوۆ تەلەگرام-ارناسىنداعى اقپاراتىنا سۇيەنسەك، ءليۋدىڭ ەفيردەگى ءسوزى ينتەرنەتتە تارالىپ، الەۋمەتتىك جەلىنى باقىلايتىن جەدەل ۋاكىل ونداعى الاۋىزدىق بەلگىلەرىن كورىپ، ەسەپ جازعان.
ونىڭ مالىمدەۋىنشە، ەلينا ليۋ اتتى 21 جاستاعى كەلىنشەك TikTok جەلىسىندە تىكەلەي ەفيرعا كىرىپ، ون مىڭعا جۋىق كورەرمەن جيناعان. سول كەزدە جەلى قولدانۋشىلارىنىڭ ءبىرى ونىڭ ۇلتىن سۇراپ، مەملەكەتتىك تىلدە سويلەۋىن تالاپ ەتكەن.
ال وعان تيكتوكەر قازاق ءتىلىن جەككورەتىنىن، جانە قازاق ءتىلى مامبەتتەر ءتىلى ەكەنىن، مامبەتتەردىڭ كەسىرىنەن اباي كوشەسىندە كەپتەلىس بولاتىنىن ايتقان.
"مەن قازاق ءتىلىن ۇناتپايمىن. شىنىمدى ايتسام، بۇل مامبەتتەر ءتىلى" دەي وتىرىپ، ليۋ قازاق ءتىلىن ۇناتپايتىنىن ايتىپ، بۇل تىلدە تەك اۋىلدان كەلگەن «مامبەتتەر» سويلەيتىنىن ايتقان (ەسكەرتۋ! سوت «مامبەت» ءسوزىن قازاق ۇلتىن جانە ءتىلىن كەمسىتۋ دەپ باعالاعان).
«سوت ءليۋدىڭ كىناسىنىڭ دالەلدەنگەنى تۋرالى قورىتىندىعا كەلىپ، ول ءوزىنىڭ ىس-ارەكەتىمەن ۇلتارالىق الاۋىزدىقتى تۋدىرعانىمەن، ۇلتتىق ار-نامىس پەن قادىر-قاسيەتتى قورلاۋمەن، ازاماتتاردىڭ قازاق ۇلتى وكىلدەرىنىڭ نامىسىنا تيگەن. ءليۋدىڭ سوزدەرى قازاقستان رەسپۋبليكاسىنىڭ ازاماتتارىنا ازاماتتىق جانە ساياسي دەسترۋكتيۆتى كوزقاراس تۋدىرادى»، – دەلىنگەن سوت ۇكىمىندە.
ەلينا ليۋ قىلمىستىق كودەكستىڭ 174-بابى "الەۋمەتتىك، ۇلتتىق، رۋلىق، ناسىلدىك، تاپتىق نەمەسە ءدىني ارازدىقتى قوزدىرۋ" بويىنشا سوتتالىپ، ەكى جىل ەڭ تومەنگى قاۋىپسىزدىك كولونياسىندا جازاسىن وتەيدى.
ۇكىم زاڭدى كۇشىنە ەنگەن جوق.
پىكىر قالدىرۋ