قىرعىزستاننىڭ ۇلتتىق قاۋىپسىزدىك كوميتەتى Forbes قازاقستاندا Top-25-كە كىرگەن بەلدى بيزنەسمەن ۆلاديمير جۇمانبايەۆقا ىزدەۋ جاريالادى.
"ۆەرتەكس گولد" كومپانياسىنىڭ يەسى ۆلاديمير جۇمانبايەۆ كامچى كولبايەۆتىڭ ۇيىمداسقان قىلمىستىق توبىن قارجىلاندىردى دەگەن كۇدىككە ءىلىندى. دەرەكتەرگە ساي جۇمانبايەۆ كولبايەۆتىڭ قىلمىستىق ارەكەتى تۋرالى بىلە تۇرا بىرلەسكەن بيزنەس-جوبالاردى جۇرگىزۋ ءۇشىن ونىمەن بايلانىس ورناتقان.
تەرگەۋ مالىمەتتەرى بويىنشا، جۇمانبايەۆتىڭ قىرعىزستانداعى التىن ءوندىرۋشى كومپانياسى 2021 جىلدان 2023 جىلعا دەيىن اي سايىن 1 ميلليون سومدى قىلمىستىق ۇيىمعا جىبەرىپ وتىرعان.
"كاسىپكەردىڭ ءوزى كولبايەۆپەن ىستىقكولدەگى "بارس" دەمالىس ورتالىعىندا بىرنەشە رەت جەكە ۇشاقپەن كەلىپ، كەزدەسۋلەر وتكىزگەن"، – دەلىنگەن حابارلامادا.
تەرگەۋ سونىمەن قاتار جۇمانبايەۆتىڭ كومپانياسى قىرعىزستاننىڭ مەملەكەتتىك ورگاندارىنان كىرىستەردىڭ ناقتى كولەمىن جاسىرعانىن كورسەتتى.
جۇمانبايەۆ قىرعىزستاندا سوت شەشىمىمەن سىرتتاي قاماۋعا الىندى. كاسىپكەر مەملەكەتارالىق، ونىڭ ىشىندە ينتەرپول جەلىسى بويىنشا ىزدەۋدە.
پىكىر قالدىرۋ