الماتى قالاسىندا اسكەري بورىشىن وتەۋگە كەتكەن الماس شاحيموۆتىڭ وتباسىنا ەكى ايدان سوڭ قارالى حابار كەلگەن. ول كەزدە ءولىمنىڭ رەسمي سەبەبىن جازاتايىم وقيعا دەپ بەرگەن. سارباز وقۋ جاتتىعۋ كەزىندە وزگەلەرگە ءقاۋىپسىز جەرگە بارۋعا كومەكتەسىپ، ءوزى قاتتى داۋىلدىڭ اسەرىنەن قۇلاعان مەتال جابدىقتىڭ استىندا قالىپ، مەرت بولدى دەلىنگەن. 

- العاشىندا بىزدە كوپتەگەن ايعاق دالەلدەر بولعاندىقتان ەكسگۋماسيا جاساتۋعا قارسى بولدىق. الايدا اسكەريلەر كەيىن بارلىق ايعاقتى، ۇلىمنىڭ اسكەري كيىمدەرىن، پوليگونداعى بەينەجازبالاردىڭ ءبارىن جويدى، – دەدى الماستىڭ اناسى. 

دەرەكتەرگە سەنسەك، وسىنشا ۋاقىت وتكەننەن سوڭ مارقۇمنىڭ تۋىستارىنىڭ كۇدىكتەرى راستالعان.

“ءمايىت ساراپتاماسىنان وڭ جاعىنان ءۇش پىشاق جاراقاتى، قىلقىندىرعانى بايقالعان ىزدەر، 26 دەنە جاراقاتى انىقتالعان. ونىڭ بۇيرەگىن ەزىپ، باس سۇيەگىن سىندىرىپ، ارقاسىنا تەمەكى باسىپ، سوندىرگەن”، – دەپ قوستى اناسى.

ودان بولەك، اناسىنىڭ ايتۋىنشا، الماس باعىنىشتى بولعان وفيسەر اسكەرگە قابىلدانا سالا جىگىتتىڭ اتىنا نەسيە العىزعان. 

“الماستى اسكەرگە كوزىنە وتا جاسالعان سوڭ بىردەن الىپ كەتتى. ولار دارىگەرلەردىڭ وتادان سوڭ جارتى جىل فيزيكالىق كۇش سالۋعا بولمايدى دەگەن تىيىمىنا قارامادى. 27 مامىر ونى الىپ كەتتى. مامىردىڭ 28ء-ى كۇنى ۇلىم الماتىعا جەتتى. 29-دا اسكەري بولىمىنە جەتىپ، 30-دا ونىڭ اتىنا نەسيە راسىمدەلگەن”، – دەدى اناسى. 

الماستىڭ وتباسى ەكى جىلدان بەرى ادىلدىك ءۇشىن كۇرەسكەن. ءتىپتى ولارعا اسكەريلەردىڭ ءوزى ماتەريالدىق وتەماقى تولەيتىنىن، اقشا، پاتەر مەن كىشى قىزدارىن وقۋعا ءتۇسىرۋدى ۇسىنعان.

ۇلتتىق گۆارديا ءتىپتى ساربازعا ەرلىگى ءۇشىن ماراپات تا بەرگەن. الايدا جاقىندارى بۇل ماراپاتتان باس تارتقان. سەبەبى ولار الماستىڭ شاڭدى داۋىلدان وزگەلەردى قۇتقارىپ ەمەس، بىرەۋدىڭ قولىنان مەرت بولعانىنا سەنىمدى. 

ەسكە سالساق، بۇعان دەيىن الماتىدا بورىشىن وتەپ جۇرگەن ساربازدىڭ قۇمدى داۋىل كەزىندە كوز جۇمعانى تۋرالى حابارلاعان ەدىك. 5574 اسكەري بولىمىندە بورىشىن وتەپ جۇرگەن سارباز وقۋ ورتالىعىندا دالالىق جاتتىعۋدا بولعان كەزدە كوز جۇمعان. ۆەدومستۆو مالىمەتىنە سايكەس، قاتتى جەل سالدارىنان شاتىردىڭ تەمىر جاقتاۋى باسىنا تيگەن.