قاراعاندى وبلىسىنداعى تالدى ارحەولوگيالىق كەشەنىنەن ساق داۋىرىنە تيەسىلى قانجار تابىلدى. مۇنداعى كونە ورىنداردى زەرتتەۋ كەزىندە اشەكەي بۇيىمدار مەن قىش ىدىستار دا كوپتەپ شىققان. 

قاراعاندى وبلىسىنىڭ شەت اۋدانىنداعى قازبا جۇمىستارىنا ءقازىر ستۋدەنت جاستار دا جۇمىلىپ جاتىر.

– قولا داۋىرىنە جاتاتىن تالدى مەن اقكەزەڭ قورىمىندا ءقازىر قازبا جۇمىستارى قىزۋ ءجۇرىپ جاتىر. باعزى زامان ادامدارىنىڭ تۇراقتارىن قازۋ كەزىندە ولاردىڭ بىرىنەن ساق داۋىرىنە جاتاتىن تەمىر قانجاردى تاۋىپ العان. «شىرىمەي، ءپىشىنى دە سول كۇيى ساقتالعان قارۋدىڭ يەسى دە وسى جەردە جەرلەنۋى بەك مۇمكىن»، – دەيدى عالىمدار. 

ارحەولوگيالىق جۇمىستارعا 120 ستۋدەنت اتسالىسىپ جاتىر.

– ساق داۋىرىندەگى «اكيناك» دەيدى. تەمىر سول كۇيى ساقتالعان. ادام جەرلەنگەن جەرىنە تۇسكەن جوق ءالى. قازبا جۇمىستارى جاسالىپ جاتىر. تابىلعان بۇل قانجار ولكەتانۋ مۋزەيىنە تابىستالاتىن بولادى. وسى ارقىلى تۋريستەرگە، قالا تۇرعىندارىنا ۇسىنىلاتىن بولادى. قازبا جۇمىستارى كەزىندە قىش قۇمىرا مەن وزگە دە اشەكەيلەر تابىلعان. ال مىنا قىپشاق داۋىرىنە جاتاتىن قورىمنان ءتورت تۇلىك سۇيەكتەرى كوپ شىققان، – دەيدى ەسكەرتكىشتەردى قورعاۋ ورتالىعى ديرەكتورىنىڭ ورىنباسارى جانبولات ءماجيتوۆ. 

جالپى تالدى كەشەنىنەن 2016 جىلى تابىلعان ساتىلى «سارىارقا پيراميداسى» تالاي ارحەولوگيالىق جاڭالىقتىڭ اشىلۋىنا سەبەپ بولىپ وتىر. كەيىن زەرتتەۋ ناتيجەسىندە ەكسپەديسيا مۇشەلەرى بۇل اۋماقتان بەعازى-داندىباي مادەنيەتىنە جاتاتىن قالا ورنىن، قوس ات پەن قىش ىدىستار قوسا جەرلەنگەن كونە قورىمدى انىقتاعان ەدى. تاريحي قورىمدار بۇگىندە قالىپقا كەلتىرىلىپ، تۋريستەردىڭ كوپ كەلەتىن ورنىنا اينالعان.

– قىپشاق داۋىرىنە جاتاتىن تاسپەن قورشالعان اۋماقتى قازۋدامىز. قورىمداردىڭ سالىنۋ ەرەكشەلىگى قىپشاق كەزەڭىنىڭ ءداستۇر-تانىمدارىنا ساي كەلەدى. نەگىزگى شارۋاشىلىعى مال ءوسىرۋ بولعان. ۇساق مال، جىلقى سۇيەكتەرىنىڭ كوپتەپ تابىلۋى دا سودان، – دەيدى «سارىارقا» ارحەولوگيالىق ينستيتۋتىنىڭ ديرەكتورى الەكسەي كۋكۋشكين.