الماتىدا اعاشتاردى قاتىگەزدىكپەن سىندىرعان ەر ادام قولعا ءتۇستى. بۇل تۋرالى Polisia.kz پورتالى حابارلادى.

بۇزاقىلىق ارەكەت الماتى وزەنىنىڭ بويىندا، تولە بي مەن رايىمبەك داڭعىلدارىنىڭ اراسىندا بولعان. ورمان قورىنا كىرەتىن جانە كەسۋگە تىيىم سالىنعان كوشەتتەردىڭ زاقىمدالۋىنا قاتىستى قىزمەت كورسەتۋشى كومپانيانىڭ وكىلى ارىز بەرگەن. قاتىگەزدىك ارەكەتكە نارازى بولعان جەرگىلىكتى تۇرعىندار الەۋمەتتىك جەلىدە دابىل قاققان.

– قازىرگى تاڭدا اعاشتاردىڭ زاقىمدالۋىنا قاتىستى قىلمىستىق ءىس تەرگەلۋدە. ارىزدانۋشىنىڭ ايتۋىنشا، تەكسەرۋ كەزىندە 36 دانا كوشەتتىڭ زاقىمدانۋى جانە ءولۋى انىقتالدى، اتاپ ايتقاندا: كاتالپا – 15 دانا، اكاسيا – 7 دانا، قاراعاش – 14 دانا. وسى قىلمىستى جاسادى دەگەن كۇدىكپەن 27 جاستاعى جىگىت ۇستالدى، ول بۇزاقىلىق ماقساتىندا اعاشتاردى سىندىرعانىن ايتتى. كۇدىكتى ۋاقىتشا ۇستاۋ يزولياتورىنا ورنالاستىرىلدى. ءىس سوتقا جىبەرىلەتىن بولادى، – دەدى اۋەزوۆ اۋداندىق پوليسيا باسقارماسىنىڭ باستىعى ۇلان ءابىلقايىر.

كۇدىكتى ءوزىنىڭ ارەكەتىن سول كۇنى كوڭىل-كۇيى بولماي، ەموسيونالدىق اۋىتقۋعا ۇشىراعانىمەن تۇسىندىرگەن.