رەسپۋبليكا كۇنىندە اباي وبلىسىندا سەنبىلىك ءوتىپ، كوشەت وتىرعىزىلدى. ءوڭىردى كوگالداندىرۋ جانە ەكولوگيالىق جاعدايدى جاقسارتۋ ماقساتىندا وتكەن شاراعا 200-گە جۋىق ادام قاتىستى. ولاردىڭ قاتارىندا وبلىس اكىمى نۇرلان ۇرانحايەۆ، ءماسليحات ءتوراعاسى قۋانىش سۇلەيمەنوۆ، وبلىستىق باسقارما باسشىلارى، ساياسي پارتيالار وكىلدەرى، دەپۋتاتتار، قوعام بەلسەندىلەرى، جاستار جانە بەلسەندى تۇرعىندارى بار.

سەنبىلىك اياسىندا جەرگىلىكتى كليماتقا ارنايى تاڭداپ الىنعان 100 ءتۇپ ۇيەڭكى مەن جوكە كوشەتتەرى وتىرعىزىلدى. بۇل اعاش تۇرلەرى ايماقتىڭ ەكولوگيالىق جاعدايىندا جاقسى ءومىر سۇرەدى جانە قالالىق كەڭىستىكتەردى كوركەيتۋگە ۇلەس قوسا الادى.

«رەسپۋبليكا كۇنى اياسىندا «تازا قازاقستان» اكسياسىن جالعاستىرىپ وتىرمىز. بۇل ءبىر كۇندىك شارا ەمەس، الداعى ۋاقىتتا دا جالعاسىن تابادى. وبلىس ورتالىعىنان بولەك، بارلىق قالا، اۋداندارىمىزدا ۇلكەن قولداۋ تاۋىپ وتىر. ءبىزدىڭ ماقساتىمىز – اعاش وتىرعىزۋ عانا ەمەس، ەكولوگيالىق مادەنيەتتى دامىتۋ»، – دەدى ايماق باسشىسى نۇرلان ۇرانحايەۆ.

سەنبىلىك تەك اعاش وتىرعىزۋمەن شەكتەلىپ قالعان جوق. قاتىسۋشىلار سونىمەن قاتار اۋماقتاردى تازالاپ، قوعامدىق اۋماقتاردى اباتتاندىردى.