بۇعان دەيىن اتىراۋ قالاسىنىڭ №2 سوتى رينات يبراگيموۆتى ماتەريالدىق تاۋەلدىلىكتە بولعان ادامعا قاتىستى دەنساۋلىققا قاساقانا اۋىرلىعى ورتاشا زيان كەلتىرگەنى ءۇشىن كىنالى دەپ تانىپ، قىلمىستىق كودەكستىڭ 107-بابى 2-بولىگىنىڭ 3-تارماعىمەن 2 جىل مەرزىمگە باس بوستاندىعىن شەكتەدى.
كەيىن اپپەلياسيالىق سوتتا ءىس قايتا قارالىپ، شەندىنىڭ ارەكەتى قايتا سارالانىپتى. ناتيجەسىندە وعان شىققان ۇكىم وزگەردى. ازامات شارتتى تۇردە جازاسىن وتەمەي، 2 415 000 تەڭگە كولەمىندە ايىپپۇل تولەيدى.
القا «كىنالى ادامعا كورىنەۋ بەلگىلى ماتەريالدىق جاعىنان تاۋەلدى ادامعا قاتىستى» سارالاۋ بەلگىسى دۇرىس تاعىلماعان دەپ شەشتى. جابىرلەنۋشىنىڭ سوتتالعانعا ماتەريالدىق تاۋەلدىلىگى تۋرالى دالەل ۇسىنىلمادى. جابىرلەنۋشىنىڭ كاسىپكەرلىك قىزمەتتى جۇزەگە اسىرعانى، ونىڭ شوتىنا اقشا تۇسكەنى تۋرالى قۇجاتتار ۇسىنىلدى. وسىعان بايلانىستى ي.ء-دىڭ ارەكەتى قك-تىڭ 107-بابىنىڭ 1-بولىگىنە قايتا سارالاندى. وعان 700 ايلىق ەسەپتىك كورسەتكىش مولشەرىندە ايىپپۇل جازاسى تاعايىندالدى، - دەيدى اتىراۋ وبلىستىق سوتىنىڭ باسپا ءسوز قىزمەتى.
ايتا كەتسەك، رينات يبراگيموۆ 2008 جىلعى ازيا چەمپيوناتىنىڭ دزيۋدودان كۇمىس جۇلدەگەرى. ەڭبەك جولىن سپورت مەكتەبىندە جاتتىقتىرۋشى بولىپ باستاعان ول 2017-2022 جىلدار ارالىعىندا قالالىق جانە وبلىستىق سپورت ءبولىمى مەن باسقارماسىندا باسشى بولدى. 2022 جىلدان 2024 جىلعا دەيىن اتىراۋ وبلىسى ماقات اۋدانىنىڭ اكىمى لاۋازىمىن اتقاردى.
وسىدان جارتى جىل بۇرىن بۇرىنعى ايەلى جىلدار بويى تۇرمىستىق زورلىق-زومبىلىق كورىپ كەلگەنىن ايتىپ شاعىمدانىپ، جەلىگە بەينەجازبا جاريالادى. بالالارىن دا تارتىپ الىپ، كورسەتپەيتىنىن ايتتى. سول سەبەپتى جاۋاپتىلاردان وعان ءتيىستى شارا قولدانىلۋىن سۇرادى.
پىكىر قالدىرۋ