اقتاۋ ماڭىندا بولعان ۇشاق اپاتىنان ءتىرى قالعان Azerbaijan Airlines ستيۋاردەسساسى ايدان راگيملي ءازىربايجاندىق بۇقارالىق اقپارات قۇرالدارىنا وقيعانىڭ قالاي بولعانىن ايتىپ بەردى.
ستيۋاردەسسا ايدانا راگيملي گروزنىيدىڭ ۇستىندە ۇشىپ كەلە جاتقاندا سىرتتان سوققى جاسالعانىن، جارىلىستى ەستىگەنىن ايتتى.
"ءبىرىنشى سوققىدان كەيىن وتتەگى ماسكالارى اشىلدى، ال جولاۋشىلارعا كومەكتەسۋگە تىرىسقاندا، ەكىنشى سوققىنى ەستىدىك"، – دەدى ەكيپاج مۇشەسى.
سونداي-اق ول اۋە كەمەسىندە وتتەگى باللونى جارىلدى دەگەن نۇسقاعا ءوز پىكىرىن ءبىلدىردى.
"ءبىز ۇشاقتىڭ ارتقى بولىگىنە بارىپ، بورتسەرىكتەرگە ارنالعان ورىندا وتىردىق جانە وتتەگى ماسكالارىن تاقتىق. مەن ارىپتەسىمە العاشقى كومەك كورسەتتىم. ءبىز اعا بورتسەرىكپەن ۇنەمى بايلانىستا بولدىق. سىنىقتار ۇشاققا ءتيدى. وتتەگى سيستەرناسىنىڭ جارىلۋى تۋرالى اقپارات دۇرىس ەمەس. ونداي بولعان جاعدايدا، ءبىز ءتىرى قالماس ەدىك. كوزىمدى اشىپ، قايدا ەكەنىمدى سۇراعانىمدا، ماعان اقتاۋدا ەكەنىمدى ايتتى"، – دەدى ايدان راگيملي.
ۇشاق اپاتىنان ءتىرى قالعان ەكىنشى بورتسەرىك زۇلفۇعار ءاسادوۆتىڭ ايتۋىنشا، ۇشاقتاعى شتاتتان تىس جاعداي اپاتتىق قونۋعا دەيىن دە باستالعان ەكەن.
«ءبىز تاڭعى ساعات 8-دە گروزنىيعا ۇشتىق. قونۋعا جاقىنداعان كەزدە اۋەجايدى وتە قالىڭ تۇمان باسقانىن كوردىك. كاپيتان ۇشاقتى تومەندەتۋگە كىرىستى، ءبىراق ناشار كورىنۋ سالدارىنان ەكىنشى اينالىمعا ۇشۋعا ءماجبۇر بولدى، تۇماننىڭ سەيىلۋىن كۇتتى. دەگەنمەن، ەكىنشى دە، ءۇشىنشى دە قونۋ ارەكەتتەرى ءساتسىز اياقتالدى»، – دەيدى ول.
ونىڭ ايتۋىنشا، ۇشقىش جاقىن ماڭداعى اۋەجايعا باعىت الۋدى ۇيعارعان، ءبىراق قونار الدىندا ۇشاق سىرتىنان دىبىستار ەستىلگەن.
«ءبىراق سول ساتتە ۇشاقتىڭ سىرتىنان ءبىرتۇرلى دىبىس ەستىلدى. مەن ارىپتەسىم ايدانمەن بىرگە دەرەۋ سالونعا شىقتىم. ءبىز جولاۋشىلار اراسىندا دۇربەلەڭ باستالعانىن كوردىك. بارىنشا جولاۋشىلاردى تىنىشتاندىرۋعا تىرىستىق»، – دەپ تولىقتىردى بورتسەرىك.
پىكىر قالدىرۋ