وقۋ ورداسىنىڭ بازاسىندا ءتۇرلى باعىتتاعى عىلىمي ورتالىقتار مەن زەرتحانالار ىسكە قوسىلدى. شەتەلدىك ۋنيۆەرسيتەتتەرمەن بىرگە ورتاق جوبالار جۇزەگە اسىرىلۋدا.
اتاپ ايتقاندا ءال-فارابي اتىنداعى قازاق ۇلتتىق ۋنيۆەرسيتەتى قىتايدىڭ سولتۇستىك-باتىس پوليتەحنيكالىق ۋنيۆەرسيتەتىمەن بىرلەسىپ 2025 جىلى عارىشقا ميكروسپۋتنيك ۇشىرۋدى جوسپارلاپ وتىر. بۇگىندە NKSat عارىش اپپاراتىن قۇرۋ جۇمىستارى جۇرگىزىلۋدە. ورتاق جۇمىس ۇلكەن تەرەڭدىكتەگى گەوديناميكالىق پروسەستەردى زەرتتەۋدىڭ نەگىزگى مىندەتتەرىن شەشۋگە ارنالعان.
قازۇۋ-دىڭ نەگىزگى ازىرلەمەلەرىنە جەر قىرتىسىنىڭ كارتاسىن جاساۋ ءۇشىن گراۆيمەتريالىق جابدىقتى قۇرۋ جاتادى، بۇل گەولوگيا جانە پايدالى قازبالاردى ءوندىرۋ سالاسىنداعى زەرتتەۋلەردى جەدەلدەتەدى. سونداي-اق، بۇكىل ەل بويىنشا قۇرىلعىلاردى باقىلاۋعا ارنالعان IoT-شليۋز ازىرلەندى.
ايتا كەتەيىك قازۇۋ عارىشقا نانوسپۋتنيك ۇشىرۋدا تاجىريبەسى بار. ءبىلىم ورداسى ورتالىق ازيادا العاشقى بولىپ ءوز «اl-Farabi 1» جانە «اl-Farabi 2» نانوسپۋتنيگىن ۇشىرعان بولاتىن.
بيىل ءال-فارابي اتىنداعى قازۇۋ-دا «قاشىقتان زوندتاۋ تەحنولوگياسى جانە قولدانۋ» قازاق-قىتاي بىرلەسكەن زەرتحاناسى ىسكە قوسىلدى. مۇندا ورتالىق ازيا وڭىرىندەگى كليماتتىڭ وزگەرۋىنەن بولاتىن سۋ تاپشىلىعى، قۇرعاقشىلىق، جەردىڭ قۇنارسىزدانۋى، ايماقتاعى سۋ تاسقىنى، جەر سىلكىنىسى سياقتى تابيعي قاۋىپ-قاتەرلەرگە مونيتورينگ جۇرگىزىلەدى.
سونداي-اق، جوو بازاسىندا «تۇراقتى دامۋ جانە تابيعاتتى ۇتىمدى پايدالانۋ» عىلىمي ورتالىعى جۇمىس ىستەيدى. وعان تدم ىسكە اسىراتىن 10 يننوۆاسيالىق زەرتحانا كىرەدى. مۇنداعى عالىمدار اعىمداعى جىلى اتىراۋ وبلىسىندا بولعان سۋ تاسقىنىنىڭ سەبەپ-سالدارىن انىقتاۋ جۇمىستارىنا قاتىستى. ولار جايىق وزەنىنىڭ باسسەينىندەگى اعىمداعى سۋ تاسقىنى جاعدايىن باعالاپ، ەسەپتىك، گرافواناليتيكالىق، گيدرولوگيالىق جانە دالالىق زەرتتەۋلەر جۇرگىزدى.
قازاقستان مەن فرانسيا اراسىنداعى قارىم-قاتىناستى نىعايتۋ ماقساتىندا اعىمداعى جىلدىڭ مامىر ايىندا قازۇۋ-دا «ورتالىق ازيانى زەرتتەۋ جونىندەگى ارحەوزوولوگيالىق ورتالىق – ZooStan» العاشقى قازاق-فرانسۋز عىلىمي ورتالىعى اشىلدى. جاڭا زەرتتەۋ نىسانى سوڭعى ميلليون جىل ىشىندە ادام مەن جانۋارلار اراسىنداعى قارىم-قاتىناس ەۆوليۋسياسىن زەرتتەۋ ءۇشىن قازاقستان، فرانسيا جانە اقش عالىمدارىن ءبىر ارناعا توعىستىردى. 3،5 ايلىق جۇمىس بارىسىندا ZooStan حالىقارالىق ەكسپەديسيالار وتكىزدى، ءىرى ەۋروپالىق جوبالارعا قارجى تارتتى جانە 2025 جىلى فرانسيادا حالىقارالىق ارحەولوگيالىق مەكتەپ ۇيىمداستىرۋعا دايىندالۋدا.
سونداي-اق 90 جىلدىق اياسىندا ZTE كورپوراسياسىمەن بىرلەسكەن يننوۆاسيالىق ورتالىق اشىلدى.
قازۇۋ مەن ZTE بىرلەسكەن يننوۆاسيالىق ورتالىعى اقپاراتتىق جانە تەلەكوممۋنيكاسيالىق تەحنولوگيالار سالاسىنداعى عىلىمي-زەرتتەۋ قىزمەتىن جۇرگىزۋ ءۇشىن ءبىلىم بەرۋ مەكەمەلەرى مەن كاسىپورىندار اراسىنداعى ىنتىماقتاستىقتى كەڭەيتۋ ماقساتىندا قۇرىلعان. سونىمەن قاتار، يننوۆاسيالىق ورتالىق بازاسىندا 5G وزىق تەلەكوممۋنيكاسيالىق تەحنولوگيالار بويىنشا وقۋ ورتالىعى جۇمىس ىستەيدى. وقۋدى اياقتاعان تۇلەكتەرگە حالىقارالىق سەرتيفيكات بەرىلەدى.
ZTE سياقتى الەمدىك تەحنولوگيالىق كوشباسشىلارمەن سەرىكتەستىك قازاقستاننىڭ عىلىمي جانە تەحنولوگيالىق الەۋەتىن دامىتۋعا ۇلەس قوسادى. مۇنداي ىنتىماقتاستىق جاڭا مۇمكىندىكتەرگە جول اشادى.
قازۇۋ-دا جۋىردا حالىقارالىق قوناق ءۇي مەنەدجمەنتى ورتالىعى ءوز جۇمىسىن باستادى. بۇل ورتالىق ارىپتەستىك بايلانىس ارقىلى گونكونگ پوليتەحنيكالىق ۋنيۆەرسيتەتىمەن (PolyU) بىرلەسىپ قۇرىلدى. اتالعان ورتالىق «ءبىر بەلدەۋ، ءبىر جول» باعدارلاماسى بويىنشا ءپانارالىق زەرتتەۋلەر جۇرگىزۋ ءۇشىن ماڭىزدى پلاتفورما بولادى دەپ كۇتىلۋدە. سونداي-اق، جوعارى ءتيىمدى فورۋمدار وتكىزۋ ارقىلى حالىقارالىق ديالوگ پەن ىنتىماقتاستىققا جاردەمدەسەتىن بولادى. ورتالىق زەرتتەۋلەرىنىڭ باسىم باعىتتارى - الەۋمەتتىك جۇمىس، دامۋ، تۇراقتى جانە قوعامدىق تۋريزم، ءتۋريزمنىڭ سيفرلىق ترانسفورماسياسى، تۋريستىك ءبىلىم بەرۋ جانە ت.ب.
بولاشاقتا جاھاندىق يننوۆاسيالار مەن تۇراقتى دامۋ بويىنشا قازاقستانداعى جەتەكشى تالداۋ ورتالىعىنا اينالادى.
پىكىر قالدىرۋ