Lada.kz باسىلىمىنىڭ مالىمەتىنشە، №31 جاڭا مەكتەپ سالىنىپ جاتقان كەزدە اتا-انالارعا قازاق جانە ورىس تىلىندەگى ارالاس مەكتەپ بولاتىنىن ايتىپ ۋادە بەرگەن. 

بۇل مەكتەپ پەن ءبىلىم باسقارماسىنىڭ رەسمي پاراقشاسىندا راستالعان. كەيىن 6 قاڭتاردا جاڭا مەكتەپتە تەك قازاق ءتىلدى سىنىپتار بولاتىنى انىقتالدى.

قالالىق ءبىلىم باسقارماسىنا كەلگەن 200-گە جۋىق مەكتەپ وقۋشىسىنىڭ اتا-انالارىنا كوميسسيانىڭ شەشىمىمەن  ورىس ءتىلدى سىنىپتار اشىلمايتىنى تۋرالى ايتىلعان. 

ءبىلىم ءبولىمى بۇل جاعدايدى كادرلاردىڭ جەتكىلىكسىزدىگى مەن مەكتەپتەگى ورىن سانىنىڭ ازدىعىمەن بايلانىستىرعان. وقۋ ورنى 900 وقۋشىعا ارنالعان بولسا، مەملەكەتتىك تىلدە ءبىلىم العىسى كەلەتىن بالالاردان 1500 ءوتىنىش كەلىپ تۇسكەن. 

سونداي-اق 17 شاعىن اۋداننىڭ تۇرعىندارىنا ءبىلىم بولىمىندە 13 شاعىن اۋدانداعى №17 مەكتەپتە جانە 27 شاعىن اۋدانداعى №16 مەكتەپتە وقۋ ۇسىنىلدى. 

اتا-انالار №17 مەكتەپتە دە ورىن جوق دەيدى. وندا 900 وقۋشىنىڭ ورنىنا 2000 بالا وقيدى. ساباقتار ءۇش اۋىسىمدا وتەدى.  شاعىن اۋدان تۇرعىندارى ماسەلەنى سوڭىنا دەيىن جەتكىزىپ، سوتتا ءوز قۇقىقتارىن قورعاۋعا دايىن.