2025 جىلعى 1 قاڭتاردان باستاپ ەلىمىزدە جۇمىس بەرۋشىنىڭ مىندەتتى زەينەتاقى جارناسىنىڭ مولشەرى ءوستى. 2024 جىلى جارنا مولشەرى 1،5% ەدى، بيىل 2،5% بولدى. 

ەسكە سالايىق، 2024 جىلدىڭ 1 قاڭتارىنان باستاپ بارلىق جۇمىس بەرۋشى زەينەتاقى جيناقتارىن قالىپتاستىرۋعا قاتىسىپ، بجزق-عا جۇمىس بەرۋشىنىڭ مىندەتتى زەينەتاقى جارناسىن (جمزج) ءوز قىزمەتكەرلەرىنىڭ پايداسىنا اۋدارا باستادى. وسىلايشا، قازاقستاننىڭ جيناقتاۋشى جۇيەسى جاڭا قۇرامداۋىش بولىكپەن تولىقتىرىلدى.

“الەۋمەتتىك كودەكسكە سايكەس، قىزمەتكەرلەر ءوز كىرىستەرىنەن تولەيتىن 10% مىندەتتى زەينەتاقى جارنالارىنان ايىرماشىلىعى – جۇمىس بەرۋشىنىڭ مىندەتتى زەينەتاقى جارناسىن جۇمىس بەرۋشى ءوز قاراجاتى ەسەبىنەن اۋدارادى. جىل سايىن جمزج مولشەرى كەزەڭ-كەزەڭىمەن ءوسىپ وتىرادى (2024 جىلى 1،5%، 2025 جىلى 2،5%، 2026 جىلى 3،5%، 2027 جىلى 4،5%) جانە 2028 جىلى 5% جەتەدى. جۇمىس بەرۋشىنىڭ جمزج ەسەپتەۋ ءۇشىن قابىلدايتىن جۇمىسكەردىڭ تابىس سوماسى ءتيىستى كۇنتىزبەلىك جىلعا بەلگىلەنگەن ەڭ تومەنگى جالاقىنىڭ (ەتج) كەم دەگەندە بىرەۋىن جانە كوپ دەگەندە 50 ەسەلەنگەن مولشەرىنەن اسپاۋعا ءتيىس”، – دەپ مالىمدەدى "بجزق" اق باسپا ءسوز قىزمەتى.

جۇمىس بەرۋشىلەر زەينەت جاسىنداعى، 1 جانە 2-توپتاعى مەرزىمسىز مۇگەدەكتىگى بار، اسكەري قىزمەتكەرلەر مەن ولارعا تەڭەستىرىلگەن ادامدار، سونداي-اق 1975 جىلدىڭ 1 قاڭتارىنا دەيىن تۋعان ادامداردىڭ پايداسىنا جمزج تولەۋدەن بوساتىلدى. قارجى مينيسترلىگىنىڭ مەملەكەتتىك كىرىستەر كوميتەتى جۇمىس بەرۋشىلەردىڭ جمزج-نى ۋاقىتىلى جانە تولىق تولەپ وتىرۋىن باقىلايدى.