ءوز ەلىمىزدە تۇرىپ، ءوز تىلىمىزدە ءوز ماسەلەلەرىمىزدى وي ەلەگىنەن وتكىزە المايتىنىمىز ۇيات – رۋسلان جۇبانىش

وسىدان بىرنەشە جىل بۇرىن استانادا قۇرىلعان تاۋەلسىز täuel[dı]sız ارت جوباسى ءبىراز ۋاقىتتان بەرى استانا، الماتى ت.ب قالالارىندا ونەر كەشىن وتكىزىپ كەلەدى. بەلگىلى جوبا قاڭتار قىرعىنى، رەسەي باسقىنشىلىعى، جاساندى ينتەللەكت جانە ەكولوگيالىق ماسەلە سياقتى قازاقستاندا جانە الەمدە بولىپ جاتقان وقيعالارعا ءۇن قاتىپ، ويلارىن باتىل ايتىپ كەلە جاتقان جاستاردان قۇرالعان. 

جاقىندا täuel[dı]sız ارت جوباسى مادەنيەت مينيسترلىگىنىڭ سالعىرتتىعىنان قۇجاتتان قاتە جىبەرىپ، قورىتىندى كەشتەرىن وتكىزە الماي، توسقاۋىلعا ۇشىراپ وتىرعاندارىن ايتىپ، دابىل قاقتى.

«تاۋەلسىز» ارت جوباسىنىڭ اۆتورى ءارى پروديۋسەرى رۋسلان جۇبانىش وسى ۋاقىتقا دەيىن ۇيىمنىڭ جۇمىستارى ءار قويىلىم سايىن سەنزۋراعا ۇشىراپ كەلە جاتقاندىعىن ايتادى. 

–         ءبىز 5 جىل بويى ۇلكەن ساحنالاردا جاساندى ينتەللەكت سياقتى جاڭا تەحنولوگيارالدى پايدالانىپ، قالىڭ كوپشىلىك نازارىنا قازاقتىڭ زاماناۋي ونەرى مەن پوەزياسىن ۇسىنىپ كەلەمىز. 2019 جىلدان بەرى 6 قالادا جالپى مىڭداعان كورەرمەندى قامتىعان 12 ۇلكەن اۋقىمدى كونسەرت بەردىك. وندا ءتىل، ۇلت ماسەلەسى، تاريحىمىز، دىڭگەگىمىز سياقتى قازاق قوعامى ءۇشىن، اسىرەسە وزەكتى ماسەلەردى قوزعاۋدان ەش تايسالمادىق. ءار كونسەرتتىڭ الدىندا ايتەۋىر ءبىر ديرەكتوردان، ءبىر باستىقتان، نە ءبىر دوكەيدەن قىسىم كوردىك دەپ ناقتى ايتا الامىز. ونىڭ بارلىعى شىمىلدىقتىڭ ارتىندا قالىپ وتىردى. ويتكەنى كورەرمەننىڭ كوڭىلىنە وبال، كومانداداعى 30 ادامنىڭ ايلار بويعى ەڭبەگىنە قيانات دەپ قاشان دا بار ديپلوماتيامىزدى سالىپ، ىڭعايلى، وڭتايلى ءبىر شەشىمىن تاۋىپ جۇردىك، – دەيدى.

سونداي-اق ول ءاربىر قويىلىم ەل اراسىندا دۇربەلەڭ تۋعىزاتىنداي بولماسا دا، ءار كەش سايىن سەنزۋراعا ۇشىراپ وتىراتىندىعىن، ەڭ سوراقىسى بۇل جولعى وتەتىن قورىتىندى كەشتەرىنىڭ وتۋىنە ۇلكەن توسقاۋىل قويىلىپ وتىرعانىن ايتىپ، كورەرمەندەردەن قولداۋ كۇتەتىنىن جەتكىزدى.

–  بۇل جولى الدىمىزعا بۇرىن-سوڭدى كورمەگەن ۇلكەن توسقاۋىل قويىلىپ وتىر. قورىتىندى كەشىمىز نەگىزى 17 جەلتوقساندا ءوتۋى كەرەك بولاتىن. ءبىراق زالداعى جوسپاردان تىس جوندەۋ جۇمىستارىنا بايلانىستى كەشىمىز 25 قاڭتارعا شەگەرىلگەن ەدى. ءبىز وسى كۇندى زالدىڭ اكىمشىلىگىمەن جانە مادەنيەت باسقارماسىنىڭ تىكەلەي رۇقساتىمەن بەكىتكەنبىز. ءبىراق  بۇل جولى زالدا باسقا شارا وتەتىنىنە جانە مادەنيەت باسقارماسى قۇجاتتى قاتەلەسىپ جولداعانىنا بايلانىستى قورىتىندى كەشىمىز وتپەيىن دەپ تۇر. ءوز ەلىمىزدە تۇرىپ، ءوز تىلىمىزدە ءوز ماسەلەلەرىمىزدى، ونەر، مادەنيەت پەرفورمانس دەڭگەيىندە وي ەلەگىنەن وتكىزە المايتىنىمىز ۇيات. بىردە ءبىر كونسەرتىمىزدە زاڭعا قايشى قانداي دا ءبىر ارەكەتكە ۇندەيتىن سوزدەر ايتىلعان ەمەس. بىردە ءبىر كونسەرتىمىزدەن كەيىن جۇرت داۋرىعىپ، بۇلىك شىعارعان ەمەس. ءبىراق ەلىمىزدە ءوز كولەڭكەسىنەن قورقىپ، قازاقتىڭ قارا ءسوزى مەن قارا ولەڭىنىڭ پارقىنا بويلاي بەرمەيتىن باس-باسىنا بي بولعان وڭكەي قيقىم جەتىپ جاتىر. ەڭ باستىسى، ءبىز اۋديتوريامىزعا قاشاندا ادال بولىپ كەلدىك. الدىمىزدا تاڭداۋ تۇرعاندا ارىمىزدى، ابىرويىمىزدى ويلاپ، بيلەت الىپ كەلگەن ءار كورەرمەننىڭ ءقادىرىن ءبىلىپ كەلدىك. ءدال وسى ساتتە ءبىر ءارقايسىڭىزدان قولداۋ كۇتەمىز، – دەيدى رۋسلان جۇبانىش.

تاۋەلسىز täuel[dı]sız ارت جوباسى قورىتىندى كەشتەرىندە «جەرگە تابىن ادام ەندى» قويىلىمىن قويماق ەدى. وندا 1930 جىلدارداعى اشارشىلىق، 1949-1989 جىلدارداعى سەمەي پوليگونى جانە بۇگىنگى ەكولوگيالىق الەۋمەتتىك قاۋىپتەر تۋرالى كورسەتىلمەك بولعان.كەش مازمۇنى دا زاماناۋي قازاق پوەزياسى مەن توعجان قاسەنوۆا، سارا كەمەرون سياقتى جاھان دەڭگەيىندەگى عالىمداردىڭ ەڭبەگىنە نەگىزدەلگەن دەيدى جوبا اۆتورى.