اباي وبلىسىندا «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا اۋىلدىق جەرلەردە 62 مەديسينالىق-سانيتارلىق العاشقى كومەك كورسەتۋ نىساندارىنىڭ قۇرىلىسى اياقتالدى. قازىرگى ۋاقىتتا مەديسينالىق ۇيىمداردىڭ بالانسىنا بەرۋ پروسەسى جۇرگىزىلۋدە. بيىل تاعى ەكى نىسان اياقتالادى. سونىمەن قاتار، «اۋىل – ەل بەسىگى» باعدارلاماسى اياسىندا ءۇرجار اۋدانى ءۇرجار اۋىلىندا كۇندىزگى ستاسيونارمەن 50 ادام قابىلدايتىن دارىگەرلىك امبۋلاتوريا سالۋ جوباسى ىسكە اسىرىلۋدا.
دەنساۋلىق ساقتاۋ باسقارماسىنىڭ باسشىسى تالعات مولدابەكوۆ اۋىلدىق جەرلەردە كادر تاپشىلىعى باعىتىندا دا بەلسەندى جۇمىس جۇرگىزىلىپ جاتقانىن اتاپ ءوتتى.
«بيىل كادر تاپشىلىعى ماسەلەسىن شەشۋ ءۇشىن 8،5 ملن تەڭگە كولەمىندە ءبىرجولعى كوتەرمە جاردەماقى ءبولۋدى قاراستىرۋ جوسپارلانۋدا. ءبىز 2025 جىلى الەۋمەتتىك قولداۋ شارالارى قولدانىلاتىن اسا تاپشى ماماندىقتاردىڭ تىزبەسىن انىقتاۋ بويىنشا جۇمىستى جالعاستىرامىز. كادرلاردى دايارلاۋعا دا ەرەكشە كوڭىل بولىنۋدە. جەرگىلىكتى بيۋدجەت قاراجاتى ەسەبىنەن وبلىستان 80 مامان 2024 جىلى شەتەلدە وقۋدان ءوتتى. ولاردىڭ ىشىندە رەسەي، گەرمانيا جانە ءازىربايجاننىڭ جەتەكشى مەديسينالىق مەكەمەلەرىندە تاعىلىمدامادان وتكەن اۋدان ورتالىقتارىنان 15 مەديسينا قىزمەتكەرى بار. بۇل باعدارلاما بىلىكتىلىكتى ارتتىرۋعا جانە اۋىل مەديسيناسىنىڭ جۇمىسىنا زاماناۋي تاسىلدەردى ەنگىزۋگە باعىتتالعان» - دەپ اتاپ ءوتتى باسقارما باسشىسى.
اۋىل تۇرعىندارىنا مەديسينالىق كومەكتىڭ قولجەتىمدىلىگىن ارتتىرۋ ءۇشىن وبلىستا 173 ەلدى مەكەندى قامتيتىن 9 جىلجىمالى مەديسينالىق كەشەن جۇمىس ىستەيدى. 2024 جىلى 64 435 تۇرعىن مەديسينالىق كومەك الدى.
اۋىلدىق جەرلەردە مەديسينالىق كومەكتى دامىتۋدىڭ نەگىزگى باعىتتارىنىڭ ءبىرى – ماتەريالدىق-تەحنيكالىق بازانى جاڭارتۋ. 2024 جىلى 1،3 ملرد تەڭگەدەن استام سوماعا 200 مەديسينالىق تەحنيكا ساتىپ الىندى. 2025 جىلعا 1،2 ملرد تەڭگەگە تاعى 182 بىرلىك تەحنيكا ساتىپ الۋ جوسپارلانۋدا.
پىكىر قالدىرۋ