بۇعان دەيىن سيفرلىق پلاتفورمادان جوعالىپ كەتكەن قازاق مۋزىكاسى امەريكالىق Meta Instagram كورپوراسياسىنىڭ سەرۆيسىندە قايتا پايدا بولدى.
قازنەت قولدانۋشىلارى Instagram جەلىسىندەگى ەسكى جازبالارىندا وتاندىق ورىنداۋشىلاردىڭ بۇرىن وشىرىلگەن اندەرى قايتارىلىپ، اۋديوترەكتەردىڭ قايتا قولجەتىمدى بولعانىن بايقاعان.
بۇل رەتتە قازاقستان رەسپۋبليكاسى ادىلەت مينيسترلىگى Central Media Newsكە جاعدايعا قاتىستى تۇسىنىكتەمە بەرە المايتىندارىن، سەبەبى ماسەلەنى ەكى كومپانيا: "قازاق" پەن "مەتا" شەشىپ جاتقانىن ايتتى.
سونداي-اق قازاقستان اۆتورلار قوعامىنىڭ وكىلدەرى وسىعان وراي ادىلەت مينيسترلىگىنىڭ قاتىسۋىمەن باسپا ءسوز ءماسليحاتىن وتكىزۋگە ۋادە بەرگەن.
ايتا كەتەيىك، امەريكالىق Meta كورپوراسياسىنىڭ قىزمەتتەرىندەگى قازاقستاندىق مۋزىكالىق كونتەنت 2024 جىلدىڭ 27 قاراشاسىنان باستاپ قولجەتىمسىز بولدى. سونداي-اق پايدالانۋشىلار وتاندىق اۆتورلاردىڭ مۋزىكاسىن ىزدەۋ مۇمكىندىگىنەن ايىرىلدى. سودان كەيىن "مەتا" ولاردىڭ وكىلدەرىنىڭ "قازاق"-پەن كەلىسىمگە كەلە الماعانىن، سوندىقتان وسى اۆتورلار قوعامىنىڭ كاتالوگىنداعى بارلىق مۋزىكا Instagram جانە Facebook-تە وشىرىلگەنىن ايتتى.
الەۋمەتتىك جەلىدەگى قولدانۋشىلاردىڭ نارازىلىعىنان كەيىن ادىلەت مينيسترلىگى مەتا مەن قازاقستان اۆتورلار قوعامى اراسىنداعى داۋدى شەشۋگە ارەكەتتەندى. ادىلەت مينيسترلىگى بۇل كەلىسپەۋشىلىك جاعدايىن بۇرىن-سوڭدى بولماعان دەپ اتادى. ۆيسە-مينيستر بوتاگوز جاقسەلەكوۆا تاراپتار اراسىنداعى كيكىلجىڭدى قازاقستاندا وسىعان ۇقساس 15 ۇيىمنىڭ بولۋىمەن ءتۇسىندىردى جانە مەتا ولاردىڭ قايسىسىمەن كەلىسىم-شارت جاساسۋ كەرەكتىگىن انىقتاي الماي قينالادى. ويتكەنى، كوپتەگەن ەلدەردە ارتىستەردىڭ اۆتورلىق قۇقىقتارىن ءبىر ۇيىم باسقارادى.
