الەۋمەتتىك جەلىدە qazaq_robin_hood لاقاپ اتىمەن تانىلعان «ەلگە كومەك» قايىرىمدىلىق قورىنىڭ جەتەكشىسى ءىلياس سارييەۆ ۇستالدى.

بۇل تۋرالى زاڭگەر نۇرسۇلتان ورىنبەكوۆ الەۋمەتتىك جەلىدەگى پاراقشاسىندا جازدى.

«قازاق روبين گۋد — ءىلياس سارييەۆ الاياقتىق بابى بويىنشا ۇستالدى»، — دەپ حابارلادى ول.

الماتى قالالىق پوليسيا دەپارتامەنتى بۇل اقپاراتتى راستادى. قازىرگى ۋاقىتتا قىلمىستىق ءىس قوزعالىپ، تەرگەۋ امالدارى جۇرگىزىلىپ جاتىر.

«المالى اۋداندىق پوليسيا باسقارماسىنا قاراستى بولىمدە الاياقتىق دەرەگى بويىنشا قىلمىستىق ءىس قوزعالدى. جان-جاقتى ءارى وبەكتيۆتى تەرگەۋگە باعىتتالعان ءبىرقاتار تەرگەۋ شارالارى جۇرگىزىلۋدە. ناتيجەسىندە پروسەسسۋالدىق شەشىم قابىلدانادى»،  دەپ حابارلادى الماتى پوليسيا دەپارتامەنتى.

بۇعان دەيىن «ەلگە كومەك» قايىرىمدىلىق قورى داۋعا ىلىككەن بولاتىن. الەۋمەتتىك جەلىدە قور قارجىنى ماقساتسىز جۇمساعانى تۋرالى اقپارات تارادى. ءتىپتى جۋرناليست گۇلميرا ءابىقايعا بىرنەشە ادام حابارلاسىپ، الدانىپ قالعاندارىن ايتقان. قور الەۋمەتتىك جەلىدە «ءۇي الىپ بەردىك» دەپ ەسەپ بەرگەنىمەن، شىن مانىندە ول ءۇي يەسىنە بەرىلمەگەنى ايتىلدى. الايدا قور جەتەكشىسى ءىلياس سارييەۆ بۇل اقپاراتتىڭ بارلىعىن جوققا شىعارعان ەدى.