اقتوبە وبلىسىندا 200 ميلليون تەڭگەدەن استام قارجى بولىنگەن ساياباق قۇرىلىسى بەس جىلدان بەرى اياقتالماي كەلەدى. جوبا باستاپقىدا ءبىر جىلدا اياقتالادى دەپ جوسپارلانعان بولاتىن. الايدا قارجىلاندىرۋدىڭ ءۇزىلىپ، تۇراقسىز جۇرگىزىلۋى قۇرىلىس جۇمىستارىنىڭ كەشىگۋىنە سەبەپ بولعان.

قاندىاعاش قالاسىندا بەس جىل بۇرىن قۇرىلىسى باستالعان ساياباق ءالى كۇنگە دەيىن تولىق پايدالانۋعا بەرىلمەگەن. 234 ميلليون تەڭگە بولىنگەن جوبا اياقتالسا دا، جاعدايى مۇشكىل. ءقازىر نىساننان كوڭىل جۇباتاتىن ەشتەڭە قالماعان: سىنعان ورىندىقتار، كۇيرەگەن سپورت الاڭى، جانباعان شامدار مەن كۇتىم كورمەگەن كوگالدار.

4 گەكتار اۋماقتا ورنالاسقان ساياباقتا سپورت الاڭى، كوپىرلەر، دەمالىس ورىندارى بولۋى ءتيىس ەدى. ءبىراق باسكەتبول الاڭىندا قۇرساۋلار جوق، ستاديون قاقپالارىنىڭ تورلارى جىرتىلعان، ال بەتونى ءمۇجىلىپ كەتكەن. كوشەلەرگە ورناتىلعان شامدار العاش ورناتىلعان كۇننەن بەرى جۇمىس ىستەمەيدى.

“كەشكە كەلۋگە قورقامىز”

جەرگىلىكتى تۇرعىن گۇلميرا وتەنيازوۆا ساياباقتىڭ قاراۋسىز قالعانىن ايتىپ قىنجىلادى:

“جارىق جوق، بارلىق شامى سىنعان. مەن كەشكە قىدىرعىم كەلەدى، ءبىراق بۇل جەر وتە قاراڭعى. ال جازدا كۇننەن قورعاناتىن جەر جوق. كوشەتتەردىڭ ءبارى قۋراپ قالدى. ولار سۋارىلماسا كەرەك. مۇندا كىم كەلەدى؟”

2020 جىلى پايدالانۋعا بەرىلۋى ءتيىس نىسان بەس جىلدا ارەڭ اياقتالىپ، وتكەن جىلى كەمشىلىكتەرىنە قاراماستان شەنەۋنىكتەر تاراپىنان قابىلدانىپ كەتكەن. قالا اكىمى قازبەك اققايىر جوندەۋ جۇمىستارى باستالاتىنىن ايتتى:

“جول توسەيتىن تاستاردى جارتىلاي اۋىستىرامىز. كەيبىر جەرلەردە ونىڭ ۇستىنەن كولىكتەر ءجۇرىپ قۇلاعان. مەردىگەر ساياباققا كىرە بەرىستەگى سىنعان اباجۋرلار مەن گرانيت تاقتالاردى ءوز قاراجاتىنا اۋىستىرادى. ءبىز كومپانياعا حات جولداپ، جوندەۋگە ءبىر اي ۋاقىت بەردىك”.

"ماڭگىلىك الاۋ" – تەك اتى بار

ساياباقتىڭ قاق ورتاسىنا ورناتىلعان "ماڭگىلىك الاۋ" دا تۇرعىنداردىڭ كوڭىلىنەن شىقپاعان. سەبەبى ول ەشقاشان جانبايدى. بۇل جاعدايدى شەنەۋنىكتەر “سيرەك جاعىلاتىن سيمۆولدىق ەلەمەنت” دەپ تۇسىندىرۋگە تىرىستى.

الايدا بۇل جاۋاپتار جۇرتشىلىقتىڭ نارازىلىعىن باسا العان جوق. الەۋمەتتىك جەلىدە دە، قالا تۇرعىندارى اراسىندا دا 234 ميلليون تەڭگەگە وسىنداي ساپاسىز جۇمىس جاسالعانى قىزۋ تالقىلانۋدا. شەنەۋنىكتەر الداعى ۋاقىتتا تاعى قانشا قاراجات بولىنەتىنىن ناقتىلامادى.