استانادا وتكەن اسكەري پاراد كەزىندە ەلگە ەڭبەگى سىڭگەن تىل ارداگەرى، نەيروحيرۋرگ تەڭدىك يساقوۆتى تريبۋناعا وتكىزبەي قويعان ءسات الەۋمەتتىك جەلىلەردە كەڭ تارالىپ، جۇرتتىڭ جۇرەگىن اۋىرتتى.

استانا اكىمدىگى بۇل جاعدايدى «پارادقا كىرۋ تەك الدىن الا جاسالعان ارنايى ءتىزىم ارقىلى جۇزەگە استى» دەپ ءتۇسىندىردى. تىزىمگە تەك ارداگەرلەردىڭ تۋىستارى بەرگەن ءوتىنىش نەگىزىندە ەنگىزىلگەندەر ەنگەن. ال تەڭدىك يساقوۆتىڭ وتباسىنان ونداي ءوتىنىش تۇسپەگەن كورىنەدى.

دەگەنمەن، كوپشىلىك بۇل تۇسىنىكتەمەگە قاناعاتتانباي وتىر. جەلى قولدانۋشىلارى:
«ءقازىر ساناۋلى عانا ارداگەر قالدى. وسىنداي كىسىلەردى اكىمدىك ءوزى ىزدەپ، قۇرمەتپەن كولىك جىبەرىپ الىپ كەلۋى كەرەك ەدى. بۇل – ەلگە جاساعان ەڭبەكتى ۇمىت قالدىرۋ»، – دەپ نارازىلىق بىلدىرۋدە.

بەلگىلى ءانشى زارينا وماروۆا دا Instagram پاراقشاسىندا پىكىر ءبىلدىرىپ:
*«وسىدان ەكى جىل بۇرىن ءبىر ارداگەر اتانى كوشەدە تاكسي توقتاتىپ تۇرعان جەرىنەن ۇيىنە جەتكىزىپ سالعان ەدىم. وتە كىشىپەيىل، اشىق-جارقىن ادام ەكەن. سول كەزدە 67 جىل بويى نەيروحيرۋرگ بولىپ ەڭبەك ەتكەنىن ەستىپ، تاڭعالعانمىن. ناعىز باتىر، ناعىز ەڭبەك ادامى. بۇگىن سول كىسىنى پارادقا كىرمەي قالعان ساتىنەن كورىپ، جانىم اۋىردى. وسىنداي جاندار – ەلدىڭ ناعىز ماقتانىشى. ۇمىتىلۋعا ءتيىس ەمەس»، – دەپ جازدى.

ورىن العان جاعدايدان سوڭ، استانا اكىمدىگى ارداگەر مەن ونىڭ تۋىستارىمەن كەزدەسىپ، كەشىرىم سۇراعان. سونداي-اق، تەڭدىك يساقوۆ 9 مامىر كۇنى وتەتىن گۇل شوعىن قويۋ راسىمىنە ارنايى شاقىرىلدى.

الايدا بۇل وقيعا قوعامدا ۇلكەن وي تۋدىردى: ارداگەرلەردىڭ ءقادىرىن پارادتىق راسىممەن ەمەس، ناقتى قۇرمەتپەن كورسەتۋىمىز قاجەت ەمەس پە؟